Punyeta sulod sa classroom

G“ ood morning, class,” nangatahoran ko sa klase nako sa Philippine Politics and Governance. “I won’t discuss anything today. Manan-aw tag salida.”

“Yehey,” ningsyagit ang mga kugtong.

“Kinsay naay file sa Heneral Luna diha?” nangutana ko. “Ako sir,” mitubag ang usa. “Ok, kana atong tan-awon,” miingon ko.

Ug nagsugod ang salida, ug napuyo ming tanan.

Maoy nakanindot aning mga eskuylahan nga kompleto sa pasilidad, sama sa TV screen. Dili pul-an ang mga bata, labi na kining henerasyon karon nga nagtubo sa social media, kanang kinahanglan gyod nga naa silay makita nga naglihok sa screen.

Kapoyan ni silag maestro nga magsige lag yawyaw, kanang kon di sila magbantay mapiskan pas laway.

Puol na kaayo ang nawong ni sir, mo-absent lang sa ko ron. Kapoya aning sir oy, sigeg yawyaw. Maypag mo-absent.

Sa tinuoray lang, naay panahon nga mas masabtan ang topic kon ipaagi nimog salida. Mahimo nga sugdan nimo og mubo nga diskusyon, ug dayon suportahan kini nimo og video. Mao ni ang gitawag sa Eningles og visual aid.

Wala ni sa among panahon. Kaniadto, mapugos ang maestra og yawyaw tibuok adlaw kay wala pa may teknolohiya sama karon. O kon naa na man gani, walay budget ang eskuylahan aron makagamit ani nga teknolohiya.

Kutob ra mi sa kartolina nga drowing-drowingan og lainlaing parte sa lawas, kon biology pananglitan ang subject. Karon, mag-download na lang kag video gikan sa Internet, makita na nimo kon giunsa paggaling sa imong tinai ang imong kinaon, o kon unsa kakusog mobomba og dugo ang imong kasingkasing labi kon ikaw nahigugma.

Ug labaw sa tanan, ang pagtan-aw og salida sa classroom maghatag og higayon sa maestro nga makapahuway. Sa tinuoray lang, nagpasalida kog Heneral Luna sa klase kay labihang labada sa akong ulo kay nag-hangover ko. Samtang gibombahan og pamalikas ni Gen. Antonio Luna ang akong mga estudyante, ako tua sa luyo natulog.

Kay duha ka oras man ang Heneral Luna, gitiwas ni namo pag sunod meeting. Ug human sa salida, amo dayon kining gi-discuss.

“Unsay dili ninyo malimtan nga linya sa salida?” nangutana ko.

“Punyeta!” mitubag ang usa ka estudyante. Nangatawa ang tibuok klase.

“Nganong polio ang sakit ni Mabini?” mibawos ko. “Ngano man sir?”

“Kay si A-polio-nario man siya,” mitubag ko, dayong ingon, “Class dismissed! aron di na sila kabawos.