Mama ug anak
Dear Noy Kulas,
Maayong adlaw ninyo sa Superbalita. Nagpadala ko nimo aning suwat kay magpatambag ko. Tawga lang ko og Toro, 32 anyos na. Kining akong problema parte og relationship pero unique.
Nakauyab ko og 22 years old nga nagtrabaho sa usa ka kompaniya diri sa Cebu. Mga six monts na mi sukad nagka relationship kay gipaila-ila mi sa among mutual friends. Aron ma-formal ang akoa kay gawas nga gwapa, buotan kaayo mao akong gitinarong, namisita ko niya before wa pa ko sugta.
Sa akong pagpamisita, nakabantay na ko sa iyang mommy (single mom) nga magsige og pahiyom nako. Ang iyang mommy 45 na, pero batan-on pa og nawong. Maora pa og early 30s kay slim ug maayo og barog. Mas sexy pa sa akong uyab. Maayo siyang managad pero mommy lagi sa akong uyab, wa ko magmalisya.
Diha toy higayon, namisita ko, pero wa diha akong GF kay iyang gisugo og palit og something. Siya ang ni entertain nako ug gi-interview ko. Until nga nitupad siya nako ug ni-kiss. Nakalitan ko pero lalake lagi ta, nahitabo ang di angay mahitabo. Sukad ato, magkitaay na mi sa mommy niya ug di masipyat, naay mahitabo namo.
Naka-feel na ko og guilt, Noy, kay buotan kaayo ang akong uyab. Pero niingon iyang mommy nga di siya against sa among relationship sa iyang anak kay ganahan siya nako. Ang akoa ra kuno ako siyang sabton nga nag-need siya og partner, kanang kasaligan ug buotan. Mao ni ang nakalibog nako ron. Love nako ang akong uyab, pero kon ako sab talikdan ang mommy, di kaha mi buwagon niya? Or kon mosulti ko sa akong, seguradong magubot sila. Please tambagi ko.
TORO
Tor,
Unique bitaw ni imong problema pero di ni first nakong nasugatan. Naa sab to kaniadto, pero ang nakalahi, minyo na silang duha dihang nagkarelasyon ang iyang mama ug iyang bana dihang iyang nasakpan.
Talk to the mom kon unsay imong na-feel karon. Sultihi siya nga na-guilty ka ug kinahanglan nga inyo nang putlon ang inyong relasyon kay duha mo nga cheater sa iyang anak. Ingna siya nga di maayo ang inyong gibuhat bisag unsaon og tan-aw. Ingna siya nga naluoy ka sa iyang anak. Matandog ra na siya hopefully kon pinangga na niya ang imong uyab.
Human ana, putla na ang inyong communication ug stop una sa pagpamisita aron di mo magkakita sa inahan. Resist the temptation by praying. Maglisod ka ini apan you will get through tungod sa love nimo sa imong GF.