You’re a part of me
Mihunong paglakaw si Nestor. Mihunong sab ko. Gitan-aw kog dugay ni Nestor.
“Are you sure gyud ka ana,
Lenlen?”
Seryuso kaayo si Nestor. Mipakibo ko sa akong mga abaga ug mikatawa kog hinay.
“Well, mao nay akong naobserbaran sa iyang sinultihan ug mga lihok, Nestor. But I’m not sure. Pangagpas ra gud.”
Gusto kong ipakita kang Nestor nga concern ko sa iyang lovelife bisag ngkaabot mi nga magbuwag na kay wa mi nabatyagang love sa usag usa.
Mipadayon mig lakaw si Nestor sa sidewalk. Hinay ra ang among paglakaw. Naghilom si Nestor. Klaro nga naghunahuna siya pag-ayo.
“Ayaw hunahunaa tong akong giingon, uy, Nes. Di man ko sure ato ba.”
“Aw, mao man kaha. Salamat sa imong komentaryo kang Yol. Bisan pa man ana, wa mawa’a ang pagkagusto ko niya.” Miyangu-ango ko.
“Right na nimo, Nes. Kadtong ako opinyon lang. Naa nimo ang final nga desisyon.” “Agad sa feeling, mao ba, Len?” “Yes. Agad sa imong tinuod nga pagbati.”
Mipahiyom si Nestor. Gipahiyoman ko sab siya.
Pagkasunod gabii, namisita si Garry nako. Sa laing university nagtungha si Garry. Nagkaila mi usa ka higayon ana nga kusog ang uwan ug wa ko makadalag payong. Nagkaabot mi sa usa ka waiting shed. Dugay ming nakasakay kay diyotay ra ang mibiyaheng dyip depasaheroan. Nagkaestoryahay ug nagkailhanay mi si Garry. Nagkasuginlanay mi bahin sa usag usa namo. Dihang misakay na kog dyip, iya kong gipayongan aron di ko mabasa sa uwan.
Ug kadto ang sinugdanan nga nagkasuod mi. Magpamisitahan na siya nako sa among balay. Gisultihan ko siya sa tanan bahin namo ni Nestor. Nga nagkahinigugmaay mi si Nestor nga ang nagbuot mao ang tagsa-tagsa namo ka mga ginikanan.
Gikaila na sab ni Nestor si Garry kay kanunay man silang magkadungan sa pagpamisita nako.
“So, may chance na gyud ko nimo ron, Len?”
Nag-atbang mig lingkod si Garry sa sala.
“As usual, Gar, inigsuon ra gihapon ang pagtagad ko nimo. Wa pa gyud ko mobatig love hangtod karon. Mao sab nay rason nga nagkasabot mi si Nestor nga magbuwag. Wa sab siyay nabatyagang gugma nako.”
Mipauli si Garry nga misaad nako nga magpadayon siyang mangulitawo ug magmahal nako. (SUMPAYAN)