Kalamboan, hagit sa research studies
Naabot ang mga tigpanukiduki sa industriya sa kahimsug ug akademya sa rehiyon ni’ng bag-o pa lang aron makig-ambit sa ilang mga nasuhid, samtang gituki nila ang mga hagit ug kabalaka nga ilang giatubang ubos sa temang “Research and Innovations: Linking Theory and Practice.”
Nagkatapok sila sa Cebu Normal University (CNU) sulod sa tulo ka adlaw alang sa ilang ika3 nga tinuig nga Central Visayas Health Research and Innovation Conference uban sa pagabag sa Department of Science and Technology (DOST).
Gipahigayon ubos sa Philippine Council for Health Research and Development (PCHRD), gibag-o sab sa mga sakop sa Central Visayas Consortium for Health Research Development (CVCHRD) ilang mga pasalig ug giabi-abi ang bag-ong mga institusyon nga mipasakop nila.
Gihangop ni CVCHRD tsirman Enrico B. Gruet, M.D. ang mga delegado nga nahatagan og mga madasiging mensahe gikan nilang DOST-7 direktor Edilberto L. Paradela ug Dr. Filomena T. Dayagbil, pangulo sa CNU.
Gisugdan nila ang komperensya sa usa ka panaghisgot kabahin sa Biotechnology nga gilakipan og mga podium presentation, samtang ila sa’ng giila ang mga kaubanang nakapakita sa ilang sinaad, kamaayo ug kolaborasyon sa uban.
Isip keynote speaker, giambit ni Prof. Michael Joseph S. Diño, PhD, direktor sa Research Development and Innovation Center sa Our Lady of Fatima University, ang iyang nasuhid kabahin sa “Juxtapositioning Theory and Praxis towards Research, Development and Innovation.”
May tulo ka plenarya ang panagtipon nga unang mituki sa “Key Challenges in Research Innovations: From Research to Development,” matod ni Marciana R. Mariñas, Science and Technology librarian sa University of San Carlos.
Mihilambigit ang ikaduha sa “Engaging in Society of Health Research Communicators (SHARE): The Role of Science Communication in Promoting Research and Innovation,” ug ang ikatulo sa: “Science in Transition: Opportunities and Challenges.”
Gitutokan sa unang sesyon ang Biomedical device innovation pinaagi sa “Robotic Exoskeletons for Rehabilitation” sa Agapay Project nilang Prof. Nilo T. Bugtai, Ph.D., ug Aira Patrice R. Ong, ang nangulo sa nagduki.
Anaa sab ang “Content Analysis of Tweets of Pregnant Women with Diabetes” nga giambit ni Dr. Helen V. Madamba, MD, usa ka medical specialist at Vicente Sotto Memorial Medical Center.
Gutuki sab sa sesyon ang “One Health Boat Project” sa Motiong, Samar nga naugmad sa municipal health officer nga si Dr. Katerina Nono-Abiertas, MD alang sa inter-island health referral system.
Sa ikatulong sesyon, mihatag og mga giya kabahin sa “International Cooperation in Research and Development” si Dr. Charlotte M. Chiong, MD, PhD, direktor sa Philippine National Ear Institute ug Newborn Hearing Screening Reference Center.
Gikompleto ang mga pakigambit ni Jude O. Sasing, pangulo sa Orthopaedic International, Inc., nga mitanyag sa mga pamaagi sa open innovation sa pagpanukiduki.