TEAM PILIPINAS BATOK SA IRAN
Mokombati ang Team Pilipinas sa balwarte sa mga higante sa Iran sugod karong alas 8:30 sa gabii (RP time) nga wala ang 7-footer nga si Greg Slaughter sa laing tipik sa FIBA World Cup qualifiers.
Natugtan na man tuod si Slaughter nga makaduwa isip lokal nga magduduwa sa Team Pilipinas apan dili gihapon kini makapakita og aksyon gumikan kay aduna kini angol sa iyang tiil.
Tungod niini, ang tanang dagko nga nahabiling mga magduduwa sa Team Pilipinas nagkinahanglang modoble og kayod alang sa usa ka misyon – pugngan ang 7’2” nga higante sa Iran nga si Hamed Hadadi.
Sa pagpadaplin ni Slaughter, si national coach Yeng Guiao nakadesisyon nga ipaslak si Fil-German Christian Standhardinger sa iyang Final 12 aron makatabang sa pag-alkontra kang Hadadi.
Gawas kang Standhardinger, magpas-an sab og bug-at nga obligasyon sila si Raymond Almazan, Beau Belga, Asi Taulava ug PJ Erram sa ilawom nga bahin.
Ang ubang mga magduduwa nga gilakip ni Guiao sa Final 12 mao sila si Marcio Lassiter, Paul Lee, Gabe Norwood, Allein Maliksi ug ang mga rookie sa national team nga sila si Scottie Thompson, Ian Sangalang, ug Alex Cabagnot.
Bisan wala si Slaughter, malaumon hinuon gihapon si Guiao kabahin sa ilang poruhan batok sa Iran, nga wala pa nakatilaw og pilde sa ilang balwarte.
Sa plano ni Guiao, kinahanglang dili lang gyud magpabiya og dako ang Team Pilipinas ug buhian ang tanang ikabuga niini sa krusyal nga bahin.
“I just want it to be a close match. I just want it to be tight towards the end against a home crowd, against playing in their home court,” matod ni Guiao sa interbyu sa Spin.ph.
Ang Samahang Basketbol ng Pilipinas (SBP) nanghinaot nga maalim na ang angol ni Slaughter ug sa samang higayon, nanghinaot sab ang asosasyon nga maayo ang duwa sa Final 12 nga napili ni Guiao.
“SBP is pleased with the roster that will play in Iran. We are praying that coach Yeng’s final 12 will be able to compete and beat the strong Iranian team,” asoy ni SBP president Al Panlilio.
Ang Iran ug Australia kasamtangang nagbahin sa liderato sa Group F nga pulos adunay 5-1 nga rekord samtang nagsolod sa ikatulong dapit ang Team Pilipinas ug nagsunod ang (3-3), Japan (2- 4), ug Qatar (2-4).
Sa Group E, nagbahin sa liderato ang New Zealand, Jordan, ug Lebanon nga pulos adunay 5-1 nga rekord samtang nagsunod ang South Korea (4-2), China (33), ug Syria (2-4).
Ang mopatigbabaw nga tulo sa matag grupo ug ang
4th placer nga adunay mas taas nga standing mao ang pito nga maka-qualify alang sa World Cup. Wala na’y labot ang powerhouse China niini gumikan kay nakaseguro na man kining daan og puwesto sa World Cup.
Human sa ilang tahas sa Iran, ang Team Pilipinas mobalik sa nasod aron mo-host og usa ka closed-door nga duwa batok sa Qatar karong Septiyembre 18.