Bahad ni Osmeña gihangop ni Caindec
Nibahad si Mayor Tomas Osmeña nga bawion ang luna nga giukopahan sa Land Transportation Office (LTO) 7 kon magpadayon ang pagpanakop og mga motorsiklo o sakyanang walay plaka ug rehistrasyon.
Ang mayor nagkanayon nga gamiton niya ang maong luna isip extension sa Cebu City Medical Center samtang wa pa mahuman ang bag-ong Cebu City Medical Center (CCMC).
"If Mr. Caindec refuses to stop punishing the Cebuanos P12,000 for not having the license plates and registrations that take LTO months if not YEARS to provide, then Cebu City will turn LTO-7’s office into an extension for the makeshift hospital operating now and the CCMC that will be completed next year,” tipik sa post ni Osmeña sa iyang Facebook.
Gibasol ni Victor Caindec, direktor sa sa LTO 7, sila si Kongresista Raul del Mar sa north district ug Kongresista Rodrigo “Bebot” Abellanosa sa south distric, diin pulos wala maghatag og pagtagad sa LTO 7 aron makabalhin sa permanenting lugar.
Hinuon, ang bahad sa mayor gikalipay ni Caindec sanglit mahibaw-an sa mga Sugbuanon kinsa ang nagpabaya sa trabaho.
Giakusahan niya si Osmeña, kinsa nahimong congressman sa south district niadtong 2010, nga walay nahimo sa pagka-kongresista sud sa tulo ka tuig.
Gisaway ni Caindec ang post ni Osmeña sa iyang social media page sanglit mataranta niini ang publiko hilabi na nga daghan siya og followers.
“There is this one stupid mayor who posted in his Facebook who said that we will be apprehending vehicles with no plate,” matod ni Caindec.
Ang mga motorsiklo ug sakyanan nga narehistro ug way plaka gikan Hunyo 2016 paubos, walay apil sa operasyon sa LTO sanglit pending ang ilang mga kaso.