TRO NI GWEN GI-DENY SA CA

Gisalikway sa Court of Appeals (CA) ang gipangayo nga temporary restraining order (TRO) ni Kongresista Gwendolyn Garcia nga magpugong sa kamandoan sa Ombudsman sa pagtaktak niya sa serbisyo.

Sa iyang petition, usa sa mga argumento ni Garcia nga mahikawan sa mga proyekto ang mga konstituwente sa ikatulong distrito kon siya taktakon sa katungdanan.

Apan ang 19th Division sa CA wa makumbinsir sa mga argumento sa representante sa ikatulong distrito sa Sugbo sa gisang-at nga petition.

“The present application failed to illustrate petitioner’s right and any violation against such right that warrants this Court’s protection. Much less was it shown that an irreparable injury will result against

her if the dismissal order is

implemented,” tipik sa resolusyon ni Associate Justice Dorothy Montejo-Gonzaga sa 19th Division sa CA niadtong Agusto 24, 2018.

Sa pagkutlo ning balita, napakyas ang Superbalita Cebu pagkuha sa habig ni Garcia kay tua kini sa London.

Ang mga manlalaban ni Garcia niduso og petition for

review sa CA uban sa panghinaut nga moisyu kini og status quo ante order o TRO o writ

of preliminary injunction aron mapugngan ang pagpatuman sa dismissal order sa Ombudsman batok sa ilang kliyente.

Ang Ombudsman mitaktak ni Garcia gikan sa serbisyo gumikan sa grave misconduct kabahin sa giingong dili awtorisado nga P24.4 milyones nga proyekto pagtambak og filling materials sa dakong bahin sa Balili property nga nalubog sa tubig sa Barangay Tinaan, siyudad sa Naga.

Sa imbestigasyon, nakaplagan sa Ombudsman nga way pagtugot gikan sa Sangguniang Panlalawigan sa Sugbo ang pagsud og kontrata sa Kapitolyo tali sa Supreme ABF Construction alang sa pagtambak og filling materials niadtong 2012.

Gawas sa pagtangtang sa serbisyo, apil sa gimando sa Ombudsman ang pagdili na ni Garcia nga makakupot og pwesto sa gobiyerno, pagkansilar sa iyang eligibility ug retirement benefits.

Ang Ombudsman nimando sa napalagpot nga House Speaker Pantaleon Alvarez sa pagpatuman sa kamandoan niini, apan wa kini tumana.

Si Garcia nikwestyon sa timing sa dismissal order kinsa nitumbok ni retired Ombudsman Conchita Carpio-Morales nga suod nga higala ni retired Chief Justice Hilario Davide Jr., amahan ni Gobernador Hilario Davide III, usa sa mga respondent sa kaso.

Ang mga respondent, apil si Bise Gobernador Agnes Magpale, gihatagan og 10 ka adlaw pagkomento sa resolusyon sa CA gikan sa pagdawat sa kopya niini.

Samtang, si Garcia gihatagan og lima ka adlaw pagtubag sa komento sa mga respondent.