Pagtikas sa buhisan

Sa niaging Hulyo, ang Bureau of Internal Revenue (BIR) mipasira sa lima ka mga establisemento nga ubos sa Ong Kin King human madiskobrehi nga nag-isyu kini og mga resibo nga wala marehistro. Kini naglakip sa tulo ka restaurant, usa ka commissary ug usa ka grocery store.

Pero niadtong Huwebes, ang main store na gyud niini nga anaa mahimutang sa dalan Plaridel, dakbayan sa Sugbo mao na usab ang gipa-padlocked sa BIR.

Matod pa nga gawas sa mga resibong gipanggamit nga wa marehistro, mihimo usab diay kini og kausaban sa points of sales (POS) machines aron pagtikas sa bayranan sa ilang customers.

Si Frederick Ong, ang tag-iya sa Ong Kin King, nasurprisa ning sunodsunod nga pagsira sa iyang mga negusyo.

Iyang hugtanong gipanghimakak ug nangankon nga siyento por siyento gyud silang mituman sa bayranan sa buhis.

Saludo ta niining gihimo karon sa BIR kay kon tinuod man gani ning ilang nadiskobrehian usa kini ka dakong pamintahan ug pagpanikas sa publiko.

Pero yuna ra. Kon seryuso gyud ang BIR kalabot niining klasi sa pagpanikas, maayo siguro og dili lang sila motutok sa mga establisemento sa Ong Kin King.

Sa pagkatinuod lang kining isyu kalabot sa wa marehistrong gipanggamit nga resibo, dili kini bag-o dinhi sa Sugbo ug posibling sa uban usab nga mga dapit.

Dili man tuod tanan, apan daghang mga tindahan karon, ilabi na kining mga hardware, nga kon mopalit ka nila og mga materiyales padad-an lang ka og order o delivery slip nga wala gyuy official receit nga ipasukip.

Dunay mga pipila usab ka gasoline station nga mangutana pa kon magpa-isyu ba og resibo o dili nga otomatakik ug obligasyon man gyud unta na nila.

Hinaot mahatagan unta kini og aksiyon sa BIR.