You’re a part of me
Usa ra ang rason kon nganong gusto kong makigsuod pa gyud kang Garry. Gusto kong klaruhon sa akong kaugalingon kon wa ba gyud koy pagbati niya, kon wa ba gyud koy love niya. Para nako, kini ra ang paagi aron makita ko kining tanan.
Kinahanglang ipaduol ko ang akong kaugalingon kang Garry.
Aw, kon inigsuon lang gyud ang gibati ko niya, likayan ko na gyud siya kon ipamugos gihapon niya ang iyang gugma nako, kon di gihapon siya makasabot sa akong pagpasabot niya.
Usahay, kanang laayan ming duha sa balay kon wa mi klase, magkasabot mi nga mag-beach. Mangaligo mi sa swimming pool kon di mi makagusto sa dagat. Parehas karon nga adlawng Domingo. Nia mi karon si Garry sa usa ka iladong beach resort sa Lapulapu. Nagginukdanay mi sa paglangoy. Dihang gikapoyan na mi, namiya mi sa pagpangaligo ug nangadto sa giabangan namong open cottage. Alas onse imedya na sa udto niadtong tungora. Naniudto mi. Nagbawon ming daan og mga pagkaon, drinks ug sitsirya.
“Nangandoy ko nga unta part na ko sa imong kinabuhi, Len.”
“Part na bitaw ka sa akong kinabuhi, Gar, kay friend man ta? Pero sa pagkakaron kutob lang gyud diha. Di ka part sa akong kasingkasing. Give me enough time pa gyud.”
“I understand, Len. Wa tika dali-dalia.”
Naka-smile ko. Mipahiyoman sab si Garry.
Hapon na ming namiya si Garry sa beach resort. Gihatod ko niya sa akong gipuyan. Diha si Nestor sa ilang terrace. Nakakita siya namo ni Garry nga nagkuyog. Miwara-wara si Nestor sa iyang kamot nako. Mibawos sab kog wara-wara niya.
Nagpabilin ang among kasuod ni Nestor bisag nagbuwag mi. Para namo, di makaguba sa among friendship, nga sukad pa sa among pagka bata, ang pagkaputol sa among relasyon isip managhigugmaay. Para namo, usa lang ka duwa-duwa ang among relationship kay wa man mangulitawo si Nestor nako, ug wa ko sab siya sugta.
Ang taga-tagsa ra man namo ka mga ginikanan ang nagkasabot nga buyahon mi si Nestor, nga amo sab gipaundayonan ni Nestor. Nagkahinigugmaay mi nga way hisgotay og gugma, nga love ko ni Nestor, ug love ko sab siya.