CHAMPIONSHIP REMATCH: UC-UV
Mga duwa karon
1:00 pm- USJ-R batok CEC (jrs)
2:30 pm- UV batok USPF (jrs)
4:00 pm- USPF batok CITU (srs)
5:30 pm- UV batok UC (srs)
Masaksihan sa main game karong gabii ang labing gikaintapang engkuwentro sa 2018 Cebu Schools Athletic Foundation Inc. (CESAFI) college basketball – panagsangka og balik tali sa finalists sa miaging tuig nga mao ang defending champions University of the Visayas (UV) Green Lancers ug University of Cebu (UC) Webmasters.
Ang Green Lancers, nga ningpukan sa Webmasters, 2-1, sa finals series sa miaging tuig, hingpit na’ng nakabawi gikan sa labing ngil-ad nilang sinugdanan sa kasaysayan sa liga.
Human sila nasubhan og duha ka sunodsunod nga kapildihan lakip na ang makapakurat nga pagkadisgrasya batok sa University of Southern Philippines Foundation Inc. (USPF) Panthers, 80-81, niadtong Agusto 30, ang Green Lancers ni coach Gary Cortes nakarehistro na og tulo ka sunodsunod nga kadaugan.
Kining maong sagunson nga kadaugan gilaumang igo na aron mapukaw sa Green Lancers ilang ang kasingkasing nga 12-time champions.
Ning kombatiha, kinahanglang mapagawas sa Green Lancers ang tanan nilang ikabuga gumikan kay determinado ang Webmasters ni coach Raul “Yayoy” Alcoseba nga makalangkat pagbalik og titulo.
Ang Webmasters nakalabni og duha ka sunodsunod nga mga kampiyunato niadtong 2011 ug 2012 panahon sa Sugbuanong higante nga si JuneMar Fajardo.
Ang Webmasters kasamtangang naggunit sa solong liderato dala ang 4-0 nga rekord hinungdan nga seguradong taas ang ilang moral paingon ning kombatiha.
Unang mga gipangbiktima sa Webmasters mao ang University of San Carlos (USC) Warriors, 72-50, University of San Jose Recoletos (USJ-R) Jaguars, 72-64, Southwestern University (SWU) Cobras, 6649, Cebu Institute of Technology University (CITU) Wildcats, 81-67.
Sa laing duwa sa college division, ang Wildcats makigbatok sa University of Southern Philippines Foundation (USPF) Panthers.
Ang Wildcats adunay 0-5 nga rekord samtang ang Panthers naggunit og 3-1.
Sa high school division, makigbatok ang defending champions UV Baby Green Lancers (2-0) sa USPF Baby Panthers (1-1) sa ikaduhang duwa samtang magtagbo ang USJ-R Baby Jaguars (2-1) ug Cebu Eastern College (CEC) Dragons (2-0) sa premirong sangka.