RP WALA KA PI-OG SA IRAN
Ningbahar ang mga tirador sa gawas sa Team Pilipinas hilabi na sa 4th quarter sa ilang 73-81 nga kapildihan batok sa host Iran sa pagsugod sa second round sa FIBA World Cup qualifiers sa miaging gabii sa Azady Gym sa Tehran.
Ang Team Pilipinas nakasikit sa Iran sa nag-unang tulo ka quarters apan ningbahar ang ilang duwa sa 4th
quarter ug gipahimuslan kini sa Iranians aron pasutuyon ang ilang opensa paingon sa walo ka puntos nga kadaugan.
Hinuon bisan pa sa kapildihan, ang Team Pilipinas aduna gihapo’y poruhan nga maka-qualify sa World Cup kon ilang malupig ang Qatar karong Lunes nga ipahigayon nga closed-door sa Araneta Coliseum sa Manila.
Gihimong closed-door ang duwa sa Team Pilipinas ug Qatar isip usa sa mga silot nga gihatag sa FIBA ngadto sa Pilipinas gumikan sa nahitabong karambola tali sa Gilas Pilipinas ug Australia kaniadto.
Batok sa Iranians, bugtong si Fil-German Christian Standhardinger lang ang nakapakita og maayong duwa alang sa Team Pilipinas.
Si Standhardinger nagpau- wan og 30 puntos apan nausik ang tanan niyang paninguha gumikan kay kuwang ang suporta nga iyang nadawat. Siya lang ang nakamugna og double-digit nga puntos.
Igo lang naglabaw ang Iran og duha ka mga puntos sa sayong bahin sa 4th quarter, 6361, apan human niini, nausab na ang templada sa duwa.
Wala nanulod ang mga itsa sa tirador sa gawas sa Team Pilipinas hilabi na sila si Alex Cabagnot ug Marcio Lassiter hinungdan nga nakahigayon ang Iran pag-inat sa ilang labaw ngadto sa 11 puntos, 77-66.
Dihang nangasipyat ang mga tirador sa gawas sa Team Pilipinas, mao sab ang pagpangigo sa ilang mga kaparang sa Iran hinungdan nga nakabiya ang host squad.
Sila si Cabagnot ug Lassiter parehong miitsa sulod sa walo ka mga higayon sa three-point land apan tagsa ra ang nasulod niini, si Beau Belga mirehistro lang og 1-of-5 sa three-point area samtang sila si Paul Lee ug Gabe Norwood parehong nabutlog sa duha ka mga itsa.
Sa kinatibuk-an, ang Team Pilipinas igo lang mirehistro og 5-of-28 sa three-point land.
Sa interbyu sa www. abs-cbnnews.com, nagkanayon si Brgy. Ginebra coach Tim Cone nga nakabenipsyo og dako ang Team Pilipinas sa pagpakigbatok niini sa Iran.
“This is not a killer. This is a great learning experience for this team. Again, a lot of these guys haven’t played the international game for a long time,” pasabot ni Cone.
“The national team is all about development, developing the team and getting better. “I thought technically, this was played well. We played a good, technical game. We just didn’t get shots.”