Ang Probinsyano, Coco, daghan og natabangan
AY'G SABA! / Doodz Daclan
Ang Probinsyano tulo na ka tuig ug padayon gihapong ginuntan sa madlang pipol. Padayon nga numero uno ang Coco Martin sa primetime bida. Ako mismo nahibulong ug nasorpresa kay bisan asa ko dapita “Ang Probinsyano” man ang hisgutan, dili lang sa mga batan-on kundi hasta sa mga edaran.
Hangtud asa kutob kaha ang maong serye? Daghan ang nangutana hangtud kaha sa pagkatiguwang ni Cardo?
Unsaon man gud nga kapila na baya nato madunggan nga matapos na kini apan hangtud karon sige pa gihapon.
Nahimo nang komedya nga bisan ubanon na si Cardo padayon gihapon kining makig-kombati sa mga dautan.
Hapit tanang mga artista nahimo nang parti sa maong teleserye. Dinhi atong nakita ang pagtabang sa serye ug ni Coco Martin ngadto sa mga wala nay career sa showbiz.
Daghan sad gyud ang natabangan sa maong serye. Sa akong nadunggan tabangan sab ni Coco karon ang batang aktres nga si Rhed Bustamante nga masakiton ug naninda na lang daplin sa riles sa tren.
Di pa lang dugay ato siyang nadunggan nga namarayeg sa telebisyon nga matabangan ug karon usa si Coco nga motabang sa bata. Kon daghan ang gusto nga maka-apil sa maong serye may mga mibalibad usab ug may mga rason kon ngano.
Usa niini si Monsour del Rosario nga kaduha na diay gibalibaran ang serye ug gi-anugnan niini si Coco, apan gidawat lang sab niya ang rason nga gihatag sa action star-politician.
Ang papel unta ni Monsour congressman nga protektor sa mga druglords ug ang dako-dako sa mga kapolisan nga protektor gihapon.
Gibalibaran kini sa aktor kay basin kuno madaut ang iyang imahe. Ang gusto sa aktor nga maoy usa sa mga magtudlo kang Coco sa martial arts ug stunts.
Pero mabalik ta kon asa gyud kutob ang seryeng “FPJ’s Ang probinsyano”? Labi na nga may huhungihong nga taposon na kini. Sa nadunggan nato ni Coco nga basta naay istorya magpadayon kini, samtang ginuntan pa sa katawhan.
Gumikan niini mapasalamaton si Coco ug ang tanan sa “FPJ’s Ang Probinsyano” sa tulo ka tuig nga pagsuporta sa tanan, ay’g saba!