CHAMP alang sa Pacman
Nakadawat kagabii gikan sa League of Municipalities (LMP-Cebu) ang nailhan nga Pambansang Kamao o nasudnong kumo nga si Sen. Manny Pacquiao og award nga gitawag og C.H.A.M.P.
Mao kini ang “Cebuano Heritage Award for Manny Pacquiao” kun C.H.A.M.P.
Matod pa, masubay ang kagikan sa Pacman isip usa ka Sugboanon ug naghatag kini siya og dakong dungog di lang sa atua, lakip na sab sa tibuok nasud.
Gihatag ang maong award ni LMP-Cebu President Aljun Diamante karong gabii atol sa duwa sa Maharlika Pilipinas Basketball League (MPBL) diha sa USJ-R Basak gym. Subay kini sa gipasar nga resolusyon sa kapunongan nga pinirmahan sa mga mayor sa lalawigan sa Sugbo.
Nakahibawo na man ang tanan nga kagabii ang duwa sa Cebu Sharks batok sa Makati Skyscrapers.
NAGA
Karong hapon, atong nasayran nga modalikyat ang MPBL ug si Sen. Pacquaio ngadto sa Syudad sa Naga aron mopaabot sa ilang tabang sa mga bakwit ug pagtan-aw kon unsa pa ang ilang matabang.
Sa pagkakaron, naninguha si Mayor Kristine Chiong nga mapadali ang pagtukod sa relocation site sa mga lumolupyo nga nabiktima sa dakong landslide sa miaging Sept. 20 diha sa Barangay Tinaan.
Atong nasabtan nga uyon si Gob. Junjun Davide ug Bise Gob. Agnes Magpale nga i-donate ang tipik sa dakong luna sa kontrobersyal nga yuta kanhi sa mga Balili.
Alang kanako, gikinahanglan nga mangusog gyud si Mayor Kristine kay nakahibawo na man kita nga hinaw gyud motuyok ang makinarya sa kagamhanan. Di man gud mahimo nga mopuyo og pipila ka mga buwan ang mga bakwit diha sa mga evacuation centers.
Nasiguro ko nga isip chairman sa Committee on Public Works sa Senado, dako kaayo ang mahimo ni Sen. Pacquiao sa pagduso sa mga ahensiya nga mopaspas og lihok.
THE BOLD
Duna pa bay motuo kang PRO 7 Director Debold Sinas human niining masaker sa Barangay Malubog sa miaging semana? Nagkanayon ang duha ka survivor sa maong maduguong hitabo nga mga pulis ang ningpusil kanila.
Imbes mosusi kon unsay kamatuoran niini labi na nga di man malimod nga dunay mga police scalawag, dali kaayong nakadupa si Sinas nga way labot ang kapulisan.
Ang nakaapan lang kay human sa nahitabo kang Brgy. Konsehal Jessielou Cadungog ug ang pagbanhig sa usa ka opisyal sa PDEA nga si Ian Von Tecson, wa nay motuo sa pagpangugat ni Sinas nga way labot ang kapulisan.
Ang mga tawo nga kontra sa administrasyon moinsister nga mao gyud kini ang state policy sa war against drugs.
Ang mga pabor sa administrasyon, makonsumisyon sab kay nganong kini mga gagmay lakip lakip gani usa ka government scholar ang nangamatay unya ang mga dagkong drug
lord naa pa.
Sa laing bahin, di ba sab kini resulta sa paggamit sa kapulisan nga napuno og scalawag?
Makauuwaw nga gitawag kita (Cebu) og Cradle of Christianity apan daghang patay nga nahitabo. Nisimpatiya ko sa pamilyang nagbangutan sa mga nakalas kagahapon (Oktubre 4). Mag-ampo kita nga maimbestigahan pag-ayo sa awtoridad ang shooting incident sa (Barangay) Malubog ug mahatagan og hustisya.”
- Cebu Archbishop Jose S. Palma atol sa press confenrence