Asa ang mayor?

Samtang ang halos tanang tawo ning dakbayan naghisgot ug nipadayag sa ilang kabalaka nagka-grabe nga kriminalidad ning dakbayan, ang atong mayor hilom pa sa tirana. Walay emik. Ambot kon buhi pa ba siya, o atoa sa gawas sa nasud, o naka-official leave of absence.

Wala na man siyay tingog-tingog pinaagi sa media. Iya na gani gikanselar ang iyang inadlaw nga press conference. Pero matod pa ni Mrs. Margot Osmena kanunay’ng mo-report ang mayor sa City Hall apan dili lang magpa-interview. Kaha?

Kaniadto maayo kaayo moyawit. Dili pautang og pulong. Apan human siya gihulga nga tamparuson ni Presidente Rodrigo Duterte niadtong Agusto, atol sa Charter Day anniversary sa Mandaue City, wala na gyud siya motingog, mikakak. Niadtong daghang gipamatay nga mga pulis ug barangay officials, kusog kaayo siya mosaway sa kapulisan kay iyang gidudahan nga sila ra usab ang responsable sa mga pagpamatay.

Iyang gitumbok nga ang kapulisan maoy nagplano sa pagpatay sa iyang kaalyado nga si Tejero barangay councilor Jessielou “Jingjing” Cadungog. Nakig-away pa gani siya sa mga opisyal sa kapulisan. Apan human siya gikiha sa kapulisan gumikan sa iyang pag-interbinir niadtong nadakpan nga nag-fill og mga butane canister ginamit ang liquefied petroleum gas, tak-om na siya.

Nganong wala siya motingog sa dihang gipatay ang usa ka babayeng call center agent atol sa usa ka tulis? Labi pang wala siya motingog sa dihang adunay lima ka tawo ang gimasaker sa bukirang barangay sa Malubog diin matod pa sa mga nakalingkawas nga mga pulis ang nag

pick up ug nidala kanila sa bukid diin sila gipatay. Iya untang gitabangan ang mga kabanay nga makakab-ot og hustisya.

Kanunay niyang giingon kaniadto nga siya ang “amahan sa siyudad” ug iyang katungdanan nga protiktahan ang iyang mga anak batok sa mga kriminal ug ipabilin ang kahapsay ug kalinaw. Apan asa man siya karon nga gihulga ang dakbayan sa kriminalidad? Di ba ang amahan mao may manalipod sa iyang mga anak ug banay batok sa mga tawo nga mangahas sa pagdagmal kanila. Mitago naman hinuon siya sa saya sa iyang asawa. Talawan ug di sulundon nga amahan.