Pagsaka sa mga presyo

Usa sa mga epekto sa gitawag sa mga ekonomista nga inflation mao ang pagsaka sa presyo sa mga palaliton. Ang reklamohan sa mga tawo mao ang pagsaka sa presyo sa nag-unang mga palaliton sama sa bugas.

Ang bugas gyud maoy importante kay mahimo ra man magsud-an og period -tuslod sa asin. Sa una kon mahilaw ang linung-ag nga kan-on biliboran og asin ang takob sa kaldero aron maluto. Karon bisan og luto na, biliboran gihapon og asin ang takob sa kaldero. Giinit diay ang asin kay maoy sud-an.

Ang bulsa maoy sukdanan ning tanan. Sama sa inahan nga nireklamo ngadto sa iyang anak. Matod pa niya, “Sus anak, kaniadto magda kog usa ka gatos sa supermarket maglisod na kog alsa sa akong pinalit. Karon ang mapalit sa usa ka gatos masaling-it na lang sa kumingking. Tubag aa anak”Maayo kaniadto ma kay wa may CCTV camera.”

○○○

Ang gitumbok nga usa sa mga hinungdan sa pagsaka sa presyo mao ang umento sa presyo sa mga produkto sa lana sama sa gasolina, krudo ug uban pa. Mao kini ang gitawag nga domino effect. Matandugan ang usa, ratsada ang tanan.

Way dag-anan ang mga nasod sama sa Pilipinas nga way kaugalingong supply sa lana. Mag-agad ta sa presyo sa lana gikan sa mga nasod nga dunay lana.

Mao kana nga dihay tawo nga nireklamo nga ang tasa sa kape nga kaniadto tag P5 karon tag P10 na. Matod pas tindera,’Nisaka man gud ang gasolina.” Matod pas tawo, ‘Ayaw lang butangig gasolina akong kape.”

○ ○ ○

Ang presyo sa diesel kapin na sa P51 samtang ang presyo sa gasolina anaa na sa gikan sa kapin sa P54 ngadto sa kapin sa P60.

Duna nay petisyon ang mga operator sa jeepney ug mga bus alang sa umento sa pletihan. Madayon na gyud unya nga ang mga tawo maggukod na lang sa jeep o kaha sa taxi.

Pero kapugngan pa tingali ang pagsaka sa presyo sa mga produkto sa lana kon isuspenso sa gibyerno ang mga buhis nga gipahamtang niini.

Usa sa mga epekto sa gitawag sa mga ekonomista nga inflation mao ang pagsaka sa presyo sa mga palaliton."