Solusyon sa taas nga presyo
Ang pagpanaway makatabang lang sa pagsulbad sa problema sa nasud kon kini constructive, dili aron lang pagdaut sa imong kaatbang nga partido sa pulitika. Kini gud nga pagpanaway sa mga walhon nga grupo ug sa ubang mga oposisyon sa Duterte administration kadudahan nga ang tumong ug tuyo mao ang pagtay-ug niini aron maglagut ang katawhan sa gobiyerno.
Tinuod nga lisud ang kahimtang sa mga yanong pamilya, labi na gayud ang mga kabus, tungod sa pagtaas sa presyo sa nag-unang palaliton. Inay mag-usik sa panahon ug sa laway sa pagsigig panaway mas maayo unta kon mohimo sila og mga paagi aron masulbad kining problema nga atong giatubang. Kalimtan usa nato kining sigig bantay sa panglawas sa Presidente labi na karon nga gipahibawo na nga wala siyay cancer o seryusong sakit.
Atong nasayran nga miuyon na si Presidente Duterte nga tugutan ang tanan nga buot mopalit og bugas gikan sa gawas sa nasud inay nga ang National Food Authority (NFA) ug ang ilang otorisadong grupo lang ang maka-import og bugas humay. Kon modaghan na ang stock sa bugas gipaabut nga mobarato kini.
Mibarato na usab ang presyo sa galunggong ug tilapia didto sa kauluhan bisan kon wa pa muabot ang gipalit nga isda sa gawas sa nasud. Ang labing dakong problema mao kining kanunay nga pagsaka sa presyo sa petrolyo. Subay niini, gipatun-an na sa presidente sa finance secretary ang pagminus sa buhis o kaha pag-suspenso sa excise tax sa petroleum products.
Hinaut pang paluyohan kini sa tanang mga pulitiko aron madali sa pagpatuman kining maong mga paagi sa pagsulbad sa problema nga giatubang nato karon.
Nagpadayon pa ang pagfile sa certificate of candidacy (COC) sa mga buot mokandidato sa sunod tuig nga midterm election. Samtang anaay misayo og file anaay daghan nga unya pa sunod semana mo-file sa ilang COC. Ang ubang partido gusto lang gyud mopa-igut sa ilang line-up samtang ang uban naglisud pa pagkompleto sa ilang mga kandidato.
Ang dugay na natong nasayran nga si Cebu City Mayor Tomas Osmeña atbangan ni incumbent vice mayor Edgar Labella sa pagka-mayor. Si Mandaue City Mayor Luigi Quisumbing ug si kanhi mayor nga karon kongresista Jonas Cortes maoy magtigi sa gitawag og “battle royale.”
Samtang sa Lapu-Lapu City si kanhi mayor ug kongresista Boy Radaza maoy modagan pagka-mayor. Morag proxy war kini sa mga Radaza ug ni Secretary Adelino Sitoy. Gani ang grupo ni Sitoy maoy bendisyonan sa PDP-Laban. Apan lisud pang pildihon ang mga Radaza sa Lapu-Lapu City. Sa Danao City, makita na gayud ang tinuod nga kahiubos ni Presidente Duterte batok sa mga Durano.
Sa Talisay City, si Mayor Eddie Gullas maoy gitudlo nga district chairman sa PDP-Laban samtang si kanhi Government Service Insurance System (GSIS) president Winston Garcia maoy gitudlong chairman sa 7th district. Ang iyang igsuon, Kongresista Gwen Garcia maoy mo-challenge kang incumbent Governor Hilario Davide III.