Love is a stranger
Misulod ko sa restawran. Human ko maka-order og mga pagkaon ug drinks sa waiter nga miduol nako, gitan-aw ko si Gabriel. Naghinuktok siya. Segurado ko nga si Belinda ang iyang gihunahuna. Nagbasol tingali siya nga wa hatagi og laing higayon ang ilang gugma ni Belinda. Apan sa laing bahin, husto man sab si Gabriel. Gitunto na siya ni Belinda, gibudhian na siya ani. Duna siyay rason nga mawala ang iyang love kang Belinda, ang pagsalig ngadto sa babaye.
Angay pa ba gung saligan ang maong klase nga babaye? Parehas kang Rowan, di angay hatagag pagsalig. Traydor sab nga pagka lalaki, way baroganan.
Mitan-aw si Gabriel nako. Mitindog siya ug miduol nako. Milingkod siya sa bakanteng silya sa akong atbang. “Ganina ka ra, Jinky?” “Bag-o pa lang. Ikaw, nuon, nakita na tika daan dinhi sa akong pagsulod. Nakahuman ka na man ganig pamahaw, di ba?”
Gitan-aw ko ang mga plato, kutsara ug baso sa ibabaw sa lamesa nga nahimutangan ni Gabriel nga gipanghipos sa waiter.
“O, pero way ganang ikaon.” “Maka-move on ka ra, uy, Gab.”
“Bitaw. Di man sab angay usikan og mga luha ang babaye nga parehas kang Belinda.” Mtando ko. “Parehas sila sa akong boyfriend, maluibon.”
Gisugilon ko kang Gabriel ang nahitabo sa among relasyon ni Rowan, kon unsa siyang matanga nga pagka lalaki. Nakapanglingo si Gabriel.
“Duna gyud tingali tawo nga ingon ana, Jinky. Pero sa akong tan-aw nimo naka-recover ka na sa kasakit sa dughan.”
“Oo, Gab. Nahunahuna man gud nako nga ang gibuhat ni Rowan di mao ang katapusan sa kalibotan. Naa pa may daghang laki, ba?”
“Husto gyud ka ana, Jinky. Well, naa say daghang girl.”
Nagpahiyomay mi si Gabriel. Nakig-aper siya nako. Nataas-taas gyud ang among pag-estorya ni Gabriel sa sulod sa restawran. Hangtod sa among pagpanggawas malipayon ming duha nga nagpadayon sa pagsultihanay.
“Mangaligo ta sa swimming pool, Jink.”
Naghunahuna ko. Wa koy kondisyon nga naligo kagahapon maong dali ra kong miundang. Gitando ko si Gabriel. Misulod ko sa akong room sa hotel ug nag-ilis og para ikaligo. Nag-ilis sab si Gabriel og bathing trunk. Misamot siya kaguwapo sa akong tan-aw niya karon.