KONSEHAL BIHAG GIPANIMASLAN?

SuperBalita Cebu - - BALITA -

Target ug di lang naangin ang first councilor sa barangay Cubacub nga si Edgar Bihag sa nahitabong pagpamanhig niadtong Miyerkules sa udto sa dan P. Burgos, Barangay Alang-Alang, siyudad sa Mandaue diin namatay ang opisyal samtang samdan ang usa ka Rolando Vega.

Kini ang gipahibawo ni Mandaue City Police Office chief Julian Entoma human ilang nasuta gikan sa Ozamis City Police Station nga adunay opisyal sa barangay sa Mandaue City, diin nagtagu-tago kaniadto ang pipila sa mga sakop sa Kuratong Baleleng gang ang giingong protector kanila.

Apan atol sa lubong sa mga giilang sakop sa Kuratong nga napatay sa Cubacub sa niaging buwan nga sila Mark Lester Castillo ug Renan Mabida, giingong nanganti ang mga kauban niini nga manimalos sa mga nitraydor kanila.

Dugang ni Entoma nga niadtong Septiyembre gipatawag niya sa MCPO ang mga barangay opisyal sa Cubacub, diin si Edgar ang miangkon nga nakahalubilo ug nakauban sa pag-inum niya sila Castillo, Mabida ug uban pa.

Uban na usab ni Bihag ang pipila sa mga sakop sa kabanayng Vega, nga sila Paulino, ang barangay tanod nga napatay niadtong Lunes sa hapon, si Rolando ug ang ig-agaw niini nga giingong nagtagu-tago nga giilang si Ian.

Hinungdan nga usa sa gituohan sa kapulisan nga ang gipasabot nga opisyal nga protector ug nga nitraydor sa Kuratong, mao si Bihag, tungod sa pagpakighalubilo niini kanila.

“Target gyud si konsehal Edgar, ug collateral si Rolando (Vega) kay posible kini ang gitumbok nga protektor nila nga barangay opisyal kay nakauban nila sa inum ug gikaatubang pipila ka higayon. Ug mao usab usa sa gipasabot nga balusan nila kay nitraydor daw nila,” pasabot ni Entoma.

Dugang ni Entoma nga nisuway pa unta ang grupo ni Castillo nga mosud sa laing duha ka mga barangay sa siyudad sa Mandaue.

Matod ni Entoma nga nakasud sa Cubacub ang mga Kuratong human nga taga Cubacub ang paryente sa asawa ni Castillo.

Daku ang pagduda ni Entoma nga ania pa sa Metro Cebu ang kaubanan sa Kuratong nga mao karon ang gipangita ug giila sa kapulisan. Police outpost ug dugang mga pulis ang gipakatap diha sa barangay Cubacub sa MCPO.

Newspapers in Tagalog

Newspapers from Philippines

© PressReader. All rights reserved.