Sumalinog Bros. naghawod sa Balik-Baroto Regatta

SuperBalita Cebu - - SUPER SPORTS -

Sa ikapito nga higayon, nalabni sa Sumalinog Brothers ang kampiyonato sa 10th Balik-Baroto Regata nga gipahigayon kagahapon ug nanukad ug natapos sa Larawan Beach Resort, dakbayan sa Talisay.

Ubos sa pagpasiugda ni kanhi Customs Collector David S. Odilao, dul-an ngadto sa 30 ka mga baroto ang misalmot sa tinuig nga kompetisyon nga nagsilbi usab nga kalihukan sa kapistahan sa maong dakbayan.

Ang managsuong Sumalinog nga sila si Lyndon ug Ricardo nga taga barangay Tanke mipakita sa ilang saktong dominasyon pinaagi sa pagtapos sa lumba sulod sa usa ka oras, 23 minutos ug 27.39 segundos.

Nagsunod kanila ang panagparis gikan sa Cordova nga sila si Arnold Cabalda ug Mario Canon (1:23:41.86), samtang ikatulo ang laing taga Tanke nga sila si Gilbert Obrero ug Francisco Gamboa (1:25:55.22). Ikaupat nga mitabok sa finish line human sa kapin lima ka nautical miles nga gilay-on sa rota mao sila si Charlie Abapo ug Marlon Abing sa Tanke (1:29:56.56), ug mikompleto sa top five sila si Danilo Limpado ug Dante Lucero sa oras nga 1:33:29.28.

Ang maong lumba gipaluyohan usab Tuburan Mayor Aljun Diamante.

/ ALEX BADAYOS

■ HARI SA REGATTA. Ang managsuong Sumalinog nga sila si Lyndon (ikaduha gikan sa wala) ug Ricardo (ikaupat) nga gideklarar nila Regatta executive director David “Boy” Odilao (ikatulo) human nila gidominar ang 2018 Balik-Baroto Regatta nga gipahigayon kagahapon sa Larawan Beach sa Talisay City. Makita usab sa hulagway si Joe Deresas (tuo) ang race director.

Newspapers in Tagalog

Newspapers from Philippines

© PressReader. All rights reserved.