DRUGS NO. 1 NGA MOTIBO SA AMBUSH: PULIS
Tulo ka mga anggulo ang gisubay sa kapulisan sa syudad sa Talisay sa pagbanhig ni PO3 Micahel Santinno Cortes sa sitio Ranger, Barangay Pooc sa Biyernes sa udto nga nikalas og upat ka mga tawo, apil na sa basurera nga napagan.
Matod ni Supt. Marlu Conag, hepe sa Talisay City police station, nga ang ilang gisubay nga anggulo sa pagkakaron mao ang may kalabutan sa illegal nga drugas, illegal gambling ug personal nga atraso. Iyang gipasabot nganong drugas.
Si Conag niingon nga daghan og nadakpan nga drug personalities si Cortes sa dihang sa Barili ug siyudad sa Talisay pa nadestino ug posibling gibalikan siya niini.
Apan wa usab nila wad-a ang posibilidad nga ang mga drug player nasuko sanglit sa matag panahon nga adunay madakpan, molutaw ang ngalan ni Cortes.
“Madami kaming mahuli dito, pag may bagong pumasok na new player, tinitira nila. So, yan ang isa sa mga anggulo na tinitingnan natin,” matod ni Conag.
Ila pa usab nga sutaon kon si Cortes ba ang naa sa listahan ni Presidente Rodrigo Duterte nga nalambigit sa illegal nga drugas.
Matod ni Sr. Supt. Manuel Abrugena, hepe sa kapulisan sa probinsya sa Sugbo, nga di pa sila makasiguro kon si PO3 Micahel Cortes mao ba ang nanganlan ni President Duterte.
“We are still confirming po kung one and the same person. I-refer po namin sa higher office for confirmation,” sulti ni Abrugena.
Samtang wa pa matino kon nakapabuto ba sa ilang armas silang Cortes bisan kon aduna silay nakuha nga mga armas sa sulod sa sakyanan sa mga biktima.
Ang Scene of the Crime Operatives (SOCO) nakakuha og usa ka kalibre .45 nga pistola sa sulod sa sakyanan nga posibling iyaha sa pulis ug 11 ka mga basiyo sa kalibre .45 nga pistola.
Gituohan nga nakabawos pa sila si Cortes.
Laing nakuha mao ang duha ka mga magazine sa kalibre .45 nga dunay lima ka mga bala matag usa, upat ka mga magazine assembly sa mao nga pistola nga dunay tag unom ka mga bala ug 36 ka mga kabhang sa 5.56 mm. Ang mao nga bala haum sa armalite rifle nga gituohang usa sa mga armas nga gigamit sa mga nang-ambush base sa sulti sa mga saksi.
Usa sa mga opisyal sa Sulu Provincial Police Office nga nahinabi sa Superbalita Cebu nga di lang magpahingan nagkanayon nga adunay pagtugot ang paglarga ni Cortes pauili dinhi sa Sugbo.
Kini tungod sa pagtambong niini sa iyang hearing sa kaso sa lungsod sa Barili ug gitakda unta nga mobalik sa Jolo police station sunod semana.
“Naa na siyay travel order kay human mi makahibawo sa report nga gi ambush na siya diha sa Cebu, among gitan-aw ang record. Naa man siyay travel order gikan sa PRO ARMM,” matod sa tinubdan.
Wa na usab siya masayod sa mga lakaw ni Cortes, kon nganong nahitabo nga siya gibanhigan uban sa duha ka lalake nga silang Dennis Patiluna 43, taga Litmon, Dumlog, siyudad sa Talisay ug Jose Soroño, 45.
Ang Talisay PNP mohimo usab ug back ground investigation nilang Soroño ug Patiluna isip kabahin sa ilang imbestigasyon.
Matod ni Conag nga wala sila’y taho nga nalambigit ang duha sa ilegal nga drugas.
Apan usa nilang gitan-aw kining kalambigitan ni Cortes sa ilegal nga sugal human makit-i ang usa ka manok igtatari sa sakyanan.
“Based on reports, malakas siya pumusta. May fighting cocks sa loob ng sasakyan during the incident. May cock farm siya,” si Conag nagkanayon. /