TOM MARY ANN TANDEM

SA 2019 ELECTIONS; BOPK MILADLAD SA ILANG TIBUOK SLATE

■MAGPARES: Sila si Cebu City Mayor Tomas Osmeña (tuo) ug Konsehal Mary Ann de los Santos (wala) nagkuyog sa pag-inspection sa padayong gitukod nga Cebu City Medical Center niadtong Biyernes. Ang duha maoy magtandem sa pagka mayor ug bise mayor sa 2019 elections.

Ang tandem nila ni Mayor Tomas Osmeña ug Konsehal Mary Ann delos Santos mao ang official candidates sa Bando Osmeña Pundok Kauswagan (BOPK) alang sa pagkamayor ug bise mayor sa Dakbayan sa Sugbo sa 2019 elections.

Sa panagtapok sa 3,000 ka supporters sa Barangay Lahug kagahapon, ang BOPK, ang administration group sa Siyudad, opisyal nga nipahibawo nga si delos Santos mao ang running mate ni Osmeña.

Sa interview, si Osmeña niingon nga ang BOPK modagan ubos sa Laban ng Demokratikong Pilipino (LDP), isip ilang national party kay ang grupo “very neutral.”

Ang BOPK naa unta sa Liberal Party (LP) apan si Osmeña nakahukom sa pagbalhin human ang nasudnong grupo ni-junk sa iyang igsuon, kanhi senador Sergio “Serge” Osmeña III sa miaging election.

“Serge Osmeña will make a special announcement on the 15th,” siya niingon.

Bisan kon sila naa sa LDP, ang mayor niingon nga ang iyang suporta kang Bise Presidente Leni Robredo magpabilin bisan naa kini sa LP.

Gipahibawo usab sa grupo ang ilang kompletong slate sa pagka konsehal sa north ug south districts.

Ilang kandidato sa pagka kongresista sa north district mao si Kongresista Raul del Mar ug south mao si Kongresista Rodrigo “Bebot” Abellanosa.

Sa iyang pagpamulong, si de los Santos niingon nga ang iyang pagdagan sa mas taas nga posisyon usa ka dakong responsibilidad apan mapasalamaton siya sa kahigayunan.

“Today, another challenge has come my way, to run as vice mayor to Mayor Tommy Osmeña. It is a privilege from my humble beginnings from Barangay Lahug who rightfully shares this honor to represent a higher office if elected in May 2019. I will continue to champion what I started,” siya nagkanayon.

Kon siya modaug, si delos Santos mao ang unang babayeng bise mayor sa siyudad sa Sugbo.

Sa nangaging katuigan, sila si Osmeña ug delos Santos managkaatbang. Ang konsehal naa pa sa Kugi Uswag Sugbo (Kusug) ug nagkaatbang sa 2007 mayoral elections sa Siyudad sa Sugbo.

Napili si delos Santos nga konsehal sa Cebu City noth district sa 2013, human ang Kusug nakig-alyado sa Team Rama ni kanhi mayor Michael Rama.

Sa Agusto 2015, si delos Santos nibiya sa Team Rama ug nibalhin sa BOPK. /