Pag-usab sa ngan sa MCIA giuyonan sa komitiba
Giaprobahan sa Committee on Transportation sa Ubos Balay Balauranan ang balaudnon nga giduso sa mga kongresista nga mag-usab sa pangan sa Mactan-Cebu International Airport (MCIA) ngadto sa Lapu-Lapu-Cebu International Airport (LCIA).
Ang House Bill NO. 8170 nagtinguha nga ma-amend ang Republic Act 6958 nga nagtukod sa Mactan-Cebu International Airport Authority (MCIAA), nga gipangamahan ni Rep. Raul V. Del Mar ug niepekto niadtong 1991.
Kon maaprobahan ang ba- laudnon, ilisan na ang pulong nga Mactan ngadto sa pulong nga Lapu-Lapu.
Ang mga sponsor sa balaudnon mao sila si Reps. Del Mar, Aileen C. Radaza (lone district sa Lapu-Lapu City), Rodrigo Abellanosa (south district, Cebu City), Gerard Anthony Gullas Jr. (1st district), Wilfredo Caminero (2nd district), Gwendolyn Garcia (3rd district), Benhur Salimbangon (4th district), Red Durano (5th district), Jonas Cortes (6th district) ug Peter Calderon (7th district).
Sa ilang explanatory note, ang mga sponsor nipasabot ang pagilis sa pangan sa Mactan ngadto sa Lapu-Lapu maoy pagpasidungog kang Lapu-Lapu nga maoy unang bayani sa nasod nga nakigbuntog sa Portuguese navigator Ferdinand Magellan.
Tukma usab kini sanglit sa dakbayan sa Lapu-Lapu nahimutang ang tugpahanan.
Dili wagtangon ang pulong nga Cebu sa pangan sa airport ug sa authority nga nagdumala niini sanglit sa makasaysayanong timaan niini sa kalibutan.
“We will have to approve it in second and third reading in the House, but I doubt if we can have it done in the Senate. But the important thing is that we were able to state our strong position in including the word Cebu,” sigon ni Del Mar.
Apan alang ni Adelino Sitoy, presidential adviser on legislative affairs ug pangu sa Presidential Legislative Liaison Office, supak sa balaudnon, nga iyang gihulagway nga pagsuway sa paglangkat sa Cordova gikan sa dungog sa pangan nga “Mactan.”
“Dinawo man nang ila,” padayag ni Sitoy.
Mohangyo siya ni Presidente Rodrigo Duterte nga dili paboran ang balaudnon.