Konsehal Bas di magpasubli; naluya sa nahitabo sa 2 ka sakop sa pamilya: Bucao

SuperBalita Cebu - - BALITA -

Konsehal Arturo Bas sa dakbayan sa Talisay nga maoy amahan sa gipatay nga kanhi barangay kapitan, Marc Ferdinand Bas ug apo nga si Konsehal Art Stephen Bas, nakahukom nga di na modagan ug hingpit nang mobiya sa pulitika.

Gibutyag ni Bise Mayor Alan Bucao nga tungod sa sunodsunod nga mga hitabo sa mga sakop sa iyang pamilya, naluya na ang konsehal.

Gidakop ang iyang anak nga si Marc Ferdinand sa miaging tuig tungod sa giingong pagkalambigit sa ilegal nga drugas, apan armas ug mga bala ra ang nasakmit sa kapulisan.

Human mapasakai og kaso, nakapyansa ug gituohang nagtago-tago na tungod sa hulga sa iyang kinabuhi.

Si Marc Ferdinand namatay human rakraki sa labing minos lima ka mga tawo sa iyang giabangang balay sa Simala, lungsod sa Sibonga niadtong kaadlawon sa Oktubre 8.

Nagpadayon pa ang imbestigasyon sa pagpatay kaniya.

Si Marc Ferdinand usa sa tulo ka mga opisyal nga naa sa narco list sa Philippine Drug Enforcement Agency (PDEA) sa kaulohan.

Ang listahan gipagawas samtang nag-angat ang barangay elections sayo ning tuiga.

Ang iyang apo nga si Art Stephen, kinsa anak ni Mark Fer- dinand, gipusil patay sa may South Road Properties (SRP) niadtong Hulyo dihang paingon sa tunghaan, diin siya graduating sa kursong engineering.

Ang mao nga kaso wa gihapon masulbad ug way natumbok nga mga suspek.

Ang konsehal ni-file og leave of absence pipila ka adlaw human gipatay ang iyang apo ug gikatakdang mobalik karong Disyembre.

Karon nga nagsugod na ang pagsang-at sa certificate of candidacy, ang ngan ni Bas wa na malakip sa line-up sa partidong Alayon.

Si Bucao nibutyag nga niadto pang miaging buwan si Konsehal Bas mipahibawo na sa ilang grupo nga dili na kini magpapili pag-usab bisan bisan aduna pay duha ka nahabilin nga termino.

Kini tungod kay apektado kaayo ang konsehal sa nahitabo sa ilang pamilya ug ang desisyon ila usab nga girespitohan.

Gani dako og haw-ang ug gianugonan ang bise mayor ni Bas tungod kay ila kining nakauban sa dugayng panahon, kay gawas nga kugihan, makamao usab sa trabaho ug loyal sa partido.

Si Konsehal Bas nakahuman og tulo ka mga termino sa pagka-konsehal ug nibalik og dagan sa 2016 elections ug midaug usab.

Newspapers in Tagalog

Newspapers from Philippines

© PressReader. All rights reserved.