Pag usab-usab sa pulitika
Sunod semana, maklaro na ang kamada sa pulitika dinhi sa Siyudad sa Sugbo human sa pag-file sa mga kandidato sa ilang certificates of candidacy. Kagahapon, ang Bando Osmeña Pundok Kauswagan (BOPK) niladlad na sa ilang kompletong slate, diin mag-tandem sila si Mayor Tomas Osmeña ug Konsehal Mary Ann de los Santos.
Kahibulongan ang pulitika tungod kay ang managkaaway kaniadto, kalit lang magkauban. Ang suod ug managhigala kaniadto, mahimong higpit nga kaaway, sama sa kaso nila ni Osmeña ug de los Santos.
Sa wa pa ang 2015, ang duha mortal nga mga managkaaway, apan matod pang Osmeña nga sa paglabay sa panahom, naalim ang daan nga mga samad.
Sa wa pa ang eleksyon sa 2016, nilutaw gani ang M&M tandem, kun Margot ug Mary Ann alang sa pagka mayor ug bise mayor, apan wa kini mahinayon.
Sa dakbayan sa Mandaue, ang managkaalyado sa miaging piniliay nga sila si Mayor Luigi Quisumbing ug Kongresista Jonas Cortes mao na ang managkaatbang sa 2019 elections. Ning higayuna, managkaalyado na ang mga Cortes ug pamilyang Ouano.
Sukad pa kaniadto nga ingon niani ang dagway sa pulitika sa lokal ug nasudnon, nga di na angay pang ikahibulong. Ginaingon nga sa pulitika, ang kaaway mao ray permanente. Kini tungod sa tagsa-tagsa ka interest ug pulitikanhong ambisyon sa matag usa.
Mao usab ni ang rason nganong daghan og mga balimbing sa mga pulitiko kay kon asa sila makapabor, adto sila molinya. Himuon dayon ang rason nganong adto sila mopasilong sa payong sa labing gamhanan nga partido o kaha, kon sa ilang tan-aw, ilang masugakod ang mga kaatbang.
Samtang mao kini ang mausabong pulitikanhong talan-awon, ang katawhan nangita og kongkreto, masinati nga kausaban nga alang sa kinabag-an, kuwang ra kaayo.