Pulitika sa Toledo daghan napagan

Basta gani adunay panagsungi ang mayor ug bise mayor sa usa ka dakbayan o lungsod o ba kaha ang mayor ug ang konsiho, daghan gyud ang mapagan labi pa ang inosenteng mga empliyado. Sama aning nahitabo karon sa dakbayan sa Toledo. Ania tay nadawat mga reklamo gikan sa usa sa mga empliyado.

‘Usa ko sa nagsunod sa imong mga lindog sa newspaper ingon man sa tulimanon nimo sa sa radyo ug sa television. Super Bob, naa lang unta ko nimo ihangyo og tabang nimo kabahin aning among sitwasiyon karon sa dakbayan sa Toledo. Mao kani ang sitwasiyon namo karon Super Bob.’

‘Usa ako sa mga job order employee sa city hall. Dugay na kaming nag-antos ani among problema karon mahitungod sa among suweldo nga dugay gihatag. Ma-regular or job order employees hangtod karon wala pa makadawat sa ilang suweldo.’

‘Ang nahitabo man god Super Bob kay gisuspenso sa DILG among mayor nga si Mayor Sonny Osmeña niadtong Agosto 31, 2018 unya ning assumed si Vice Mayor Antonio Yapha isip acting mayor. Ang nakapait lang kay dili man i-honor ang signature ni acting Mayor Yapha kay tungod naa daw gikuptan si Mayor Osmeña nga decision gikan sa Court of Appeals nga gipabalik siya sa iyang pagka-mayor.’

‘Ang pangutana lang namo Super Bob, ngano wala pa man gipabalik si acting mayor Yapha isip Vice Mayor sa Toledo?

Puwerte na namong lisora Super Bob, halos wala nami ipakaon para sa among pamilya tungod sa suweldo nga gidugay nilang gihatag.

Hinaut unta Super Bob matabangan mi nimo ani among problema karon kay grabe kagubot sa pulitika diri sa dakbayan sa Toledo.’

(Well, ang akong nahibal-an diha nga ang DILG maoy mohukom kon kinsa ang ilang gi-ilang mayor. Kon under suspension pa si Sonny, dan ilang ilhon si Yapha. Legal matters naman god ni kay nakahupot man kaha og desisyon si Sonny sa Court of Appeals nga naglibkas sa iyang suspension. Ang DILG maoy mohusay ani.)