Junjun batok Gwen na sab
Siguradong battle royale ang bugno alang sa pagka gobernador sa Lalawigan sa Sugbo nilang Gob. Junjun Davide ug Kong. Gwen Garcia.
Nisang-at na sa iyang certificate of candidacy (COC) si Kong. Garcia sa miaging Biyernes nga iya sab nga adlawng natawhan. Happy Birthday Kong. Gwen!
Uban kaniya nga nisang-at og COC mao ang iyang igsuon nga si kanhi kongresista Pablo John Garcia nga nagtinguha karon nga modagan alang sa iyang kanhi katungdanan diha sa Tersero Distrito.
Ang duha maoy kandidato sa PDP-Laban ug suportado ni Presidential Assistant Mike Dino. Ang PDP-Laban, sa pagkakaron, gipangulohan nilang Energy Secretary Alfonso Cusi, kanhi Speaker Bebot Alvarez, ug kanhi Senate President Koko Pimentel.
Sa pikas bahin, nagplanong magpasubli si Gob. Junjun Davide. Gipaabot nga mosang-at siya sa iyang COC ugmang adlawa. Hinuon, di pa kita siguro kon unsang partido ang daganan ni Davide.
Samtang klaro na kon si kinsa ang bise gobernador ni Davide nga mao si Bise Gob. Agnes Magpale, di pa kita sigurado kon si kinsa ang ka-tandem ni Kong. Gwen.
Atong nasayran nga dunay tulo ka posibleng kandidato. Mao kini si kanhi mayor sa Liloan ug CPA commissioner Duke Frasco, ang tsirman sa infrastructure development committee sa RDC nga si Glenn Soco, ug kanhi mayor sa Naga Val Chiong.
Alang kanako, dakong ikatabang kang Kong. Garcia kon si Mayor Val ang modagan isip bise gobernadora kay sa kanilang Frasco ug Soco.
Apan ang pagsanong ni Val mag-agad sab sa desisyon sa iyang pamilya.
CUENCO
Gikumpirmar ni kanhi kongresista Tony Cuenco nga siya mobalik sa politika apan dili isip representante sa ikaduhang distrito sa Syudad sa Sugbo.
Modagan siya isip usa ka konsehal sa kampo sa Barug Team Rama PDP-Laban.
“Sukwahi sa tambag sa akong banay ug suod nga kahigalaan nga ako mopahuway na lang sa politika, ako nakahukom nga akong padayunon ang akong pag-alagad sa katawhan pinaagi sa pagpapili isip konsehal sa dakbayan,” matod ni Cuenco sa iyang gipadala nga press statement.
“Maoy akong tuyo nga ang ubang katuigan sa akong kinabuhi akong itagana pag-aalagad sa akong kaisguonan sa dapit diin ako gipanganak,” matod niya.
SHOWBIZ
Laing artista ang nanimpad karon nga mahimong kongresista sa amihanang distrito sa Syudad sa Sugbo nga mao si Richard Yap. Ang nakalisod lang sa iyang plano kay magsunod siya sa mga tunob ni Annabelle Rama nga gipildi sa incumbent nga si Kong. Raul del Mar.
Kon si Sir Chief diha pa modagan sa habagatang distrito, mobentaha tingale alang kaniya. Apan sa unang distrito? Ambot lang. Kuyaw malukapa.