Maintenance

SuperBalita Cebu - - SUPER BIBO - Roger E. Vallena

Kaniadto nagtuo ko nga kon makabarog na ang biseklita, mahimo ra ni nga di atimanon kay wa kiniy makina. Apan nasayop diay ko kay gikinahanglan usab diay ang maintenance niini, apan tagas lang ang interval itandi sa sakyanan nga dunay makina.

Kasagaran sa nagkinahanglan og check-up ang brake set, labina ang pads. Ang hubs ug mga kable. Kasagaran niani maoy moving parts sa biseklita. Mao ni ang kasagaran nga maoy akong mapasusi sa higala nakong mekaniko. Kaniadto si Ronald Geolin sa Aison Bike Shop ang tigtan-aw ug tigayo. But pagtrabaho ni Ronald sa Middle East niadtong 2012, ang akong higala nga si Wendell “Phukey” Valeriano na ang tig check-up sa akong mga biseklita.

Kon mosakay ko sa biseklita, akong paminawon kon wa bay kausaban, okay ra ba mokupot ang brake ug wa bay nagtingog nga moving parts. Importante kaayo nga kon mosakay kita sa biseklita, maorag mahimo kining part sa atong lawas.

Bitaw, bisan sa akong scooter, makahibawo ko nga something is wrong kon ako na kining padaganon. Wa pa gyud ko masipyat. Mao usab ni sa akoang biseklita.

MEKANIKO

Gawas kang Phukey, ang lain nakong higala nga si Van Chua duna nay bike shop sa Cadahuan, Talamban. Nakapa check na ko kang Van, apan kay si Phukey man ang source sa uban nakong bike parts, adto ko sa iyaha kasagaran magpa check.

Importante kaayo ang mekaniko sa bike maintenance. Kanang usa ra gyud ang maghiling kay nakasunod ug nasuhito sa mga problema sa biseklita. Lisod kaayo kon magbalhinbalhin og mga kamot ang biseklita. Mao usab ni ang akong gibuhat sa akong scooter, sa usa ra sab ka shop nako dad-on.

SRAM VS. SHIMANO

Moangkon ko, di ko suhito kon maghisgot ko og asay mas maayo kay bisan gani ang akong mga higala nga kapin na sa dekada nga nagsikad, maglalis pa.

Naghisgot ko ani kay naa man guy nangutana nako kon unsay mas maayo, Shimano o Sram. Nibalik sab kog pangutana kon unsa nga model. Bisan unsaog ingon nga mas nindot ang Sram, naay mga rider nga mas ganahan og Shimano.

Kon experience ang basehan, mas mo prefer ko og Sram. But wa ko mag ingon nga mas maayo ni kay sa Shimano. Depende na sa preference sa rider.

Newspapers in Tagalog

Newspapers from Philippines

© PressReader. All rights reserved.