Love is a stranger

Nakaingon ko sa hilom sa akong kaugalingon nga nakadayeg ko sa kinaiya ni Gabriel. Bisag naa siya sa kaguol apan nakahimo gihapon siya sa pag-smile. Di maklaro sa iyang nawong nga duna siyay gihambin nga frustration.

Aw, ingon man gyud kuno ani ang lalaki, di magpakita nga nadala siya sa emosyon. Di parehas sa babaye nga dali rang makahilak kon naa sa sobrang kaguol.

“O, nganong ingon ana ang tinan-awan mo nako, Gab?”

Dugay kong gitutokan ni Gabriel. Mipakibo lang siya sa iyang mga abaga dayong sawom. Ubay-ubay na ang nangaligo sa swimming pool niadtong tungora. Misawom sab ko. Hapit mi magkadungan og tunga si Gabriel. Hapit magkadapat ang among nawong. Nagpahiyomay mi.

“Dali ra kong maka-move on ani, Jinky, kay nia ka man.” “Sure ka?” Mikidhat si Gabriel nako dihang gipahiyoman ko siya.

“One hundred percent sure. Bitaw, seriously, dasig kang ikauban, Jinky. Morag wa ka na maguol sa nahitabo sa imong lovelife.”

“Well, nadawat ko na man nga di mi para sa usag usa si Rowan, Gab. You know, sa unang mga adlaw nga nahibaw-an nako nga gibudhian ko ni Rowan ug kaslunon na siya sa babaye nga iyang gipili, mora kog mamatay sa kaguol, uy. Mao bitaw nga nia ko dinhi ron, nagpahuwas ko sa kaguol. Makatabang sa akong pagmove on ang mga lugar nga ingon ani kay daghang tawo nga akong makita. Ug karon, naka-recover na ko.”

“Morag mao sab nay mahitabo nako dinhi, Jinky.”

Mihaw-as ko sa swimming pool. Gikab-ot ko ang akong tualya, nanarapo ko sa basa kong lawas ug sa akong buhok. Pagkahuman gitapis ko sa akong lawas ang tualya.

Mihaw-as sab si Gabriel sa swimming pool. Nanarapo siya sa basa niyang lawas sa iyang tualya, pagkahuman gisab-ay niya sa iyang abaga ang tualya. Milakaw ko paingon sa restawran. Mikuyog si Gabriel nako.

“Mag-order kog orange juice, Gab.”

“Mao sab nay akong tuyo, Jinky.”

Si Gabriel ang nagbayad sa duha ka basong juice para namong duha. Unya nagkuyog mi sa paglakaw-lakaw sa baybayon.

“Can I have your cellphone number, Jinky?”

“Sure.”

Ug gihatag ko kang Gabriel ang numero sa akong selpon nga nasag-ulo ko na.