24,200 KA RUNNERS, MANAGAN SA MILO

SuperBalita Cebu - - SUPER SPORTS - / PAC, RSC

Libuan ka mga runners ang molagbas sa karsada karong buntag atol sa ipahigayon nga Milo Marathon Regional Leg diin giatngan sa fans ang sikat nga mga atleta sa men’s ug women’s half marathon.

Si Ricky Ballesteros, ang organizer sa Cebu Leg, nagkanayon nga kini maoy adunay labing daghan og partisipante karong tuiga.

Base sa record, ang 5K maoy labing daghan nga adunay 14,500 ka partisipante, gisundan kini sa 10 K run nga adunay 7,000 ka miyembro, adunay 2,000 ka managan para sa 3K ug 21K run nga maoy giatngan sa tanan, adunay 700 ka mga atleta.

Ang kampyon sa miaging tuig nga si Rafael Pescos kinsa lumad nga taga Negros Occidental dili na moapil sa lumba karong buntag human siya nahimong silver medalist didto sa Ilo-Ilo City sa samang kompetisyon.

Apan padayon nga nag-ensayo si Pescos para sa sunod lumba sa dagan ug kasamtangan niyang gihatagan sa iyang oras mao ang pagtudlo sa mga batang tinun-an didto sa Victorias City.

Dili usab makita sa lumba karon ang mga inilang atleta nga silang Prince Joey Lee kinsa maoy ni-kampyon sa lumba didto sa Ilo-Ilo niadtong Sabado diin sama ni Pescos, aduna na silay slot para sa National Finals.

Gihuman ni Lee ang 21.097 kilometro (half marathon) sulod 1 ka oras, 9 ka minutos ug 58 segundos samtang si Pescos nauwahi og 5 minutos pinaagi sa iyang oras nga 1:14:40.

Apan bisan paman kon wala ang duha ka elite runners, anaa gihapon ang mga beterano nga silang Noel Tillor nga kanhi kampyon sa maong lumba.

Anaa usab si Keenan Lou James Caburnay, kinsa maoy gikonsiderar ni Gerry Mayo, club president sa Spectrum Runners nga maoy mopatigbabaw sa 21K run gumikan sa iyang abilidad.

Gawas ni Caburnay, anaa usab si Michael Largo, Agustin Ychon, Arnel Florentino, Florendo Lapiz, Ian Refuel, Desiderio Engbino ug Edil Batiancila.

Ang defending champion sa lumba sa kababayen-an nga si Ruffa Sorongon modepensa sa iyang titulo batok sa ubang elite runners sa iyang division.

Giawhag ni Ballesteros ang mga motorista sa pagpataas sa ilang pasyensya sa higayon nga makahatag og kahasol sa publiko ang pagdagan sa libuan ka mga runners.

/ SUNSTAR FILE PHOTO

Half Marathon.

Newspapers in Tagalog

Newspapers from Philippines

© PressReader. All rights reserved.