2 KA ‘KILLERS’ NAPATAY
`GUN-FOR-HIRE MISUKOL’ SA DALAGUETE POLICE NGA NAG-CHECKPOINT
Duha ka gikatahapang mga
gun-for-hire napatay sa kapulisan sa lungsod sa Dalaguete, habagatang Sugbo, alas 3:50 kagahapon sa hapon human kini giingong ningsukol.
Ang duha gitumbok sa kapulisan nga nangalambigit sa mga pagpamatay sa lungsod ug ubang mga dapit sa habagatang Sugbo, matod ni Chief Inspector Rolan L. Aliser, hepe sa kapulisan sa Dalaguete sa interbyu sa Superbalita Cebu.
Si Aliser niila sa mga suspek nga sila si Rafael Ereño Belia ug usa ka Berting.
Si Aliser niingon nga nakadawat sila og impormasyon gikan sa usa ka concerned citizen nga dunay duha ka armadong mga tawo nga nag-angkasay sa motorsiklo.
Human niini, dali silang ningresponde ngadto sa bukid ug nibutang og checkpoint sa may sityo Cambanog, Barangay Balud, bukirang dapit sa lungsod.
Mga alas 3:50 sa hapon, niagi sila si Belia ug Berting nga nag-angkasay sa motorsiklo, apan wa mohunong dihang gipara sa mga pulis nga nag-checkpoint.
Inay, giingong ninglanit kini sa ilang mga pusil ug nakigpinusilay sa mga pulis.
Ang duha ka mga suspek nangaigo sa nagkadaiyang mga dapit sa lawas ug nangamatay diha-diha sa ilang mga samad.
Si Aliser niingon nga sila si Belia ug Berting nag-inom kagahapon sa hapon sa wa pa sila manulhog sa bukid.
Giingon nga nipasiatab silang duha nga duna silay patyon nga tawo human nila og inom.
Human makainom, nanglakaw ang duha ka mga suspek dulhog sa bukid nga nag-angkasay sa motorsiklo.
Wa mobutyag ang hepe kon kinsa ang target sa duha.
Ang duha nakuhaan og .45 kalibreng pistola ug .38 kalibreng revolver.
Matod ni Aliser nga sila si Belia ug Berting mga suspek sa patay sa lungsod sa Dalaguete ug mga silingang lungsod nga mag-riding-in-tandem.
Si Aliser niingon nga ila pang palawman ang pagsusi sa pagkatawo sa duha. /