Lapeña gi-promote nuon
Niadtong Huwebes gipangrelibohan ni Presidente Rodrigo Duterte ang mga dagkong opisyal sa Bureau of Customs (BOC) nga gipangulohan ni Customs Commissioner Isidro S. Lapeña. KIni tungod sa kontrobersiya nga nadiskobrehan diha sa maong ahensiya kalabot sa P6.8 bilyones nga pagpalusot sa gituohan nga gidiling drugas o shabu pinaagi sa upat ka magnetic lifters nga nadiskobrehan didto sa bodega sa niadtong bulan sa Agusto.
Sa iyang kalagot, ang presidente mimando nga ibutang sa hanging status ang tanang mga commissioners ug department heads sa BOC, ug sa samang higayon, mitudlo kang Maritime Industry Authority (Marina) Administrator ug kanhi Armed Forces chief Rey Leonardo “Jagger” B. Guerrero nga maoy mopuli kang Lapeña.
Dunay anino sa pagduda o kaha suway sa pagbunggo ngadto ni Lapena human nga mismo ang hepe sa Philippine Drug Enforcement Agency (PDEA) nga si Aaron Aquino mibutyag nga dili diay P6.8 billion lang ang kantidad sa gipalusot nga shabu kon dili, sa ilang banabana, mokabat kini ngadto sa P11 billion.
Kon tinuod ning gisulti ni Aquino – butang nga hugot gisukwahi sab ni Lapeña – dili halayo ang posibilidad nga dunay suway si Lapeña nga motibtib sa pagbanabana sa kantidad sa shabu sa rason nga siya ray nahibawo.
Kay ubos man lagi sa iyang ahensiya angayan unta siya pahamtangan og makuting imbestigasyon aron molutaw ang kamatuoran.
Pero gibalhin ra man siya isip maoy dako sa Technical Education and Skills Development Authority (Tesda) bisan og nagusbat na ang kredibilidad niini.
Mao ni usa sa mga rason kon nganong si Duterte mora lang og giduwaduwaan sa iyang mga tawo ilabi na sa iyang kampanya sa gidiling durgas kay luag ra kaayo siya nga modisiplina sa iyang mga sinaligan.