SK chairman 'missing'

SuperBalita Cebu - - BALOR SA KUWARTA -

Sangguniang Kabataan chairman sa Barangay Tigbao, lungsod sa Badian, Sugbo ang gipangita sa iyang mga kabanay ug mga barangay official kay wa makauli.

Napalgan ang iyang motorsiklo sa tiilan sa taytayan sa mingaw nga dapit sa lungsod.

Ang opisyal giila nga si Reynell Cantila 18, nagpuyo ra usab sa maong barangay.

Matod ni Arthur Villar, SK councilor, nga pasado alas 7 sa gabii sa Nobiyembre 8, niadto sa ilang balay si Reynell aron magpahilot ug niestambay pa og pila ka oras.

Pagka alas 10 na kagabii, nananghid na nga mopauli sakay sa iyang motorsiklo, apan natingala siya nga kagahapon sa buntag, Nobiyembre 9, wa kini makauli sa ilang balay.

“Niadto na sa amoa mga alas 7 kay mag pa massage siya nako. Unya pag human ato, nangaon mi then naghigda-higda siya sa amoa then nag charge then niana siya nga ‘mouli na ko, Tol’ kay naa pa siyay buhaton sa ilaha,”asoy ni Villar.

Gisubay sa Badian police station ang dapit diin niagi si Cantilla, gikan sa balay sa iyang konsehal ug didto ilang napalgan ang motorsiklo sa kilid sa tiilan sa Manduyong bridge nga nagtangag pa ang yawe.

Ang hepe sa Badian police station, Inspector Eldmond Mondaya nagkanayon nga ang unang pagtuo nila sa dihang nakita ang motorsiklo nga natumba na nga nadisgrasya.

Apan wa silay nakita nga adunay tawo nga naangol.

“Ang among unang pagtuo kay koan ni siya, kanang nadisgrasya ba. Pero tan-aw namo sa palibot, wala may mga traces sa dugo-dugo ug mga damage gyud nga mga poste ba. Walay nadam-agan,” matod ni Mondaya.

Gipasubay nila ang mga tambalanan sa probinsya sa Sugbo ug sa dakbayan apan sa pagkutlo ning balita, wa pa silay nadawat nga impormasyon.

/TAMPO

■ MISSING? Nabalaka ang pamilya ni Barangay Tigbao, Badian Sangguniang Kabataan Chairman Reynell Cantila kay wa na siya igkita, ang motorsiklo na lang.

Newspapers in Tagalog

Newspapers from Philippines

© PressReader. All rights reserved.