Asa na ang post-closure plan sa landfill: Garganera

SuperBalita Cebu - - BALOR SA KUWARTA -

Cebu City Councilor Joel Garganera nangayo na og kalambuan sa pag-rehabilitate sa kanhi Inayawan Sanitary Landfill, unom ka buwan human sa mando sa Supreme Court (SC).

Ang kanhi chairman sa committee on environment sa konseho gikatakdang mopalabang og resolution aron sa pormal nga pag-awhag sa City Environment and Natural Resources Office (Cenro) ug Department of Public Services ( DPS) sanglit iyang gihulagway nga daw gipasagdan ra kini sa Office of the Mayor.

Iyang gisaysay nga nakabasa siya og mga balita bahin sa giplanohan nga waste-to-energy facility nga giingong tukoron sa upat ka ektaryang yuta duol sa labayanan sa basura kaniadto.

“This project must be dealt with strict scrutiny coupled with the observance of due diligence in compliance with the decision of the court, otherwise, the City might be held in contempt,” padayag ni Garganera human gipalig-on sa SC ang Writ of Kalikasan nga giisyu sa Court of Appeals.

Gihulagway sa konsehal nga mahinungdanon ang post closure plan sa kanhi landfill ug paghimo og pamaagi aron sa epektibo nga pagpakunhod sa basura gumikan usab sa pagsaka sa ekonomikanhong kalihukan sa siyudad.

Gipadayag ni Garganera hangtod karon, wala pay naduso nga closure plan ang CCENRO ug DPS aron ilang mahisgutan ug maaprobahan sa konseho para maatiman ang problema sa karaang landfill.

Gisuwayan og tawag ning mantalaan ang pangulo sa CCENRO nga si Nida Cabrera aron unta kuhaan sa ilang habig apan walay motubag sa iyang telepono

Gipikhan usab niya ang administrasyon ni Mayor Tomas Osmeña kinsa nigasto og kapin P400 milyones paghipos sa basura sa tibuok siyudad gikan sa pag-abang og mga hauler.

Si Garganera niingon nga giusik-usikan lang ni Osmeña ang kwarta sanglit sa panahon kaniadto ni kanhi Mayor Michael Rama, kapin ra sa P100 milyon ang gasto sa siyudad paghipos sa basura sa tibuok tuig.

Newspapers in Tagalog

Newspapers from Philippines

© PressReader. All rights reserved.