‘KILLER’ SA DRIVER NADAKPAN

GIILA SA NAKAKITA SA HITABO SA TISA; MIHIMAKAK KAY BAG-O RA SIYANG GIOPERAHAN

Nadakpan na sa Punta Princesa Police Station ang suspek sa pagtulis ug pagpatay sa driver sa Ken taxi niadtong Martes sa kaadlawon, Nobiyembre 7, sa Naya village, Barangay Tisa, siyudad sa Sugbo.

Ang nadakpan mao si Eric Cabigas Ramos, 30, taga sitio Pilipog, Mohon 1, Barangay Tisa.

Siya ang gitudlo sa saksi nga usa sa nipatay kang Victorio Molina, taga Marigondon, Lapu-Lapu City.

Matod ni SPO2 Deo Clarin, chief investigator sa Punta Princesa police station, nga human nanulis si Ramos ug kauban nga wa pa nganli sa kapulisan, nag-inom ni nianang pagka gabii human sa insidente.

Samtang nag-inom, giingong naligas ang iyang sulti nga usa siya sa nitulis sa driver sa Ken Taxi sa Naya Village.

Ang gikainom ni Ramos nitug-an na sa mga pulis nga iyang gikainom ang usa sa mga suspek hinungdan nga ila kining gipangita.

“Nanghambog ni siya ba sa iyang kainom. Nya ang iyang kainom bata-bata ni sa pulis. Ang pulis sad nanawag sa usa ka kauban namo nga nailhan na ang nagtulis sa driver,” matod ni Clarin.

Sa una pa, ang mga kabanay ni Molina nagduda na nga si Ramos ang nipatay sanglit managkaila sila niini.

Dugang ni Clarin nga aduna silay unang nadakpan nga kawatan ug sa dihang gipakita sa mga saksi, wa kini gitudlo.

Apan sa dihang gi videohan ug gipakita sa mga saksi si Ramos, positibo ning mitumbok kaniya nga maoy usa sa nisakay kang Molina ug mao usab ni ang nakita sa pagkanaog sa Barangay Tisa.

Lakip ang senina nga gigamit ug shorts nga itom atol sa krimen nakuha sa kapulisan sa balay sa suspek nga gihayhay.

Hugot nga gihimakak ni Ramos nga siya ang nipatay sa taxi driver.

Gipakita pa niya ang iyang tahi sa tiyan nga magmatuod nga di siya maka himo sa pagpamusil.

“Ipaklaro na nila kon ako ba gyud kay kon ako gyud, akoa ning serbisyohan. Lisura sad aning gibuhat nila nako oy. Nia pa gani ni akong operasyon o, nilayat kuno ko sa sapa pagpusil nako,” matod ni Ramos.

Giangkon niya nga napusilan na siya niadtong miaging semana ug niadtong miaging adlaw lang siya nakagawas.

Niadtong higayuna, niikyas siya sa checkpoint sa kapulisan sa Punta Princesa.

Duha ka tuig na ang nakalabay, matod ni Clarin, nakapusil patay usab si Ramos apan nakagawas kay wa mokiha ang mga kabanay sa biktima.

Siya usab ang gitumbok sa mga kaso sa patay sa Barangay Tisa ug sa mga silingang barangay nga sakop sa Punta Princesa police station.

Giila pa usab nila kinsa ang kauban ni Ramos nga maoy nipatay kang Molina. /