■LINGAW SA MGA BATA.
Makita sa ilang mga nawong ang di matukib nga kalipay sa ilang pagsakay sa nagkadaiyang rides niadtong Biyernes dihang si Mayor Paz Radaza milibre sa kabataan sa Dakbayan sa LapuLapu dihang iyang gihatag usab ang State of the Children Address niadtong Biyernes.
Kabataan sa Dakbayan sa Lapu-Lapu gipahimangnoan ni Mayor Paz Radaza sa responsable nga paggamit sa social media atol sa gipahigayon nga State of the Children’s Report 2018 niadtong Biyernes, Nobiyembre 9.
Taliwala sa gintang sa iyang edad ug sa mga batan-on, gihatagan ni Radaza og importansiya ang pagpaduol sa relasyon ngadto nila ilabi na sa hagit sa modernong panahon nga gikinahanglan nga mosunod sa uso. “If you don’t go down and
connect with them, lisod gyud kaayo,” matod sa mayor.
Gipahibawo sa mayor ngadto sa 10,000 ka mga tinun-an nga misaksi sa maong kalihokan sa Hoops Dome nga aduna sab siyay personal account sa mga nag-unang social media site. Makadawat siya og private
messages gikan sa mga batan-on. Sa wa pa hingpit isaysay ni Radaza ang iyang mensahe, ni-pose kini ibabaw sa stage ug nag-selfie diin nagsilbing background ang audience.
Pipila sa mga proyekto ug programa sa Siyudad nga gitagana alang sa kabataan mao ang pagtunol og quality education, K-12 program, pagpalambo sa City College, paghatag og cash incentives niadtong tinun-an nga mopasar sa licensure o board exams, pagpahibawo sa katungod sa kabataan, ug pagpanalipod sa ilang katungod.