P2.8M NGA SHABU NAKUHA GIKAN SA ‘DRUG PUSHERS’
Mokabat sa P2.8 million nga balor sa drugas ang nasakmit sa kapulisan sa mga dakbayan sa Sugbo ug Talisay.
Moabot sa kapin sa P2.2 million nga balor sa ilegal nga drugas nga nasakmit sa kapulisan sa syudad sa Sugbo atol sa buy bust operation sa managlahing mga lugar sa Sabado sa kaadlawon, Nobiyembre 10.
Unang nasikop alas 2:30 sa kaadlawon ang 26 anyos nga dalaga sa sitio Patag, Barangay Buot, bukirang dapit sa syudad sa Sugbo, nga si Jowelyn Gastador Compuesto.
Ang mga sakop sa Drug Enforcement Unit sa Cebu City Police Office pinangulohan ni Chief Inspector Chuck Barandog nakasakmit sa di momenos 30 gramos sa gituohang shabu human mapaliti sa buy bust operation, ang tanan mobalor og P 354,000.
Matod ni Barandog, hepe sa CDEU sa CCPO, nga makabaligyag 50 gramos matag semana si Campuesto sa mga barangay sa bukid.
Giingong nilutaw ang iyang ngalan sa dihang adunay mangadakpan nga naggamit sa ilegal nga drugas.
Siya usab ang kuhaan sa mga manuyopay sa mga bukirang barangay nga kasikbit sa Buot.
Gisubay pa nila kon asa magkuhaan sa iyang butang ang dalaga sanglit nagdumili pagtugan sa mga imbestigador.
MAS DAKO
Pagka alas 5 kagahapon sa buntag, nakasikop na usab sila sa usa ka bag-ong nailhang high value target sa may Jakosalem street luyo sa simbahan sa Sacred Heart.
Ang nasikop giila nga si Joey Rafael Rallos, 35, ulitawo, nagpuyo sa maong dapit.
Nakuha gikan kaniya ang 155 gramos nga gituohang shabu nga gibana-banang mobalor og P1,890,000.
Matod ni Barandog nga gikan sa kaulohan ang shabu nga gi supply ni Rallos dinhi sa Sugbo.
Siya usab ang mo pang apod-apod niini sa iyang mga customer sa habagatang bahin sa lalawigan ug mga silingan syudad sa Metro Cebu.
Giingong makabaligyag tunga sa kilo matag semana si Rallos.
Siya giila nga bag-ong salta sa pagpamaligya sa illegal nga drugas.
“Siya ang nag distribute sa Cebu north ug sa bukid sa north sa Cebu City, apil pud Mandaue ug Lapu-Lapu. So, dako gyud ni siya” matod ni Barandog.
Ila pang gipaubos sa imbestigasyon kon aduna ba kini grupo sa mga nalambigit sa ilegal nga drugas tungod kay dako nga supply ang ilang nakuha gikan kang Rallos.
TALISAY CITY
Pito ang nasikop ingon man na-rescue ang upat ka mga menor de edad atol sa buy bust operation kagahapon sa alas 2:00 sa hapon Sitio Long Dream, Brgy. Bulacao, dakbayan sa Talisay.
Gipangpusasan sila si Leo Carlo Cortes, 25, taga Brgy.Biasong, subject sa buy bust, uban sa kapuyo nga si Margeline Labay, 20, taga Bulacao, Talisay, ug kakunsabong si James Radana, 24.
Lakip sa nasikop nga naaktuhan nga nag-pot-session ang upat ka mga menor de edad nga 17 ug tulo ka 15 anyos.
Si Sr. Inspector Alejandro Batobalonos, hepe sa Provincial Drugs Enforcement Unit (PDEU) sa Cebu Provincial Police Office (CPPO) maoy nangulo sa buy bust operation uban ang mga sakop sa Provincial Intelligence Branch (PIB-CPPO).
Sila nipalit og usa ka putos nga shabu balor og P500.
Dihang natigayon, gipangpusasan ang mga dinakpan nga nakuhaan og 11 ka meduim nga putos, 13 ka gagmayng putos, nga motimbang tanan og 55.52 gramos.
Kini gibana-banang mobalor og P655,136.
Si Batobalonos nga nahinabi sa Superbalita Cebu nibutyag nga nakuhaan sab nila ang mga suspek og KG-9 Sub-machine pistol nga dunay walo ka mga buhing bala, ingon man kalibre .45. nga pistola nga may 15 ka mga bala ug bullet proof vest.
Naaktuhan sab nila sa ilang operation nga nagsuyop ang upat ka mga menor hinungdan nga ilang gi-rescue.
Ang shabu nga supply gikan gihapon sa kontak sa mga dinakpan sulod sa Talisay City Jail, diin kinilo ang ma-dispose matag semana sa Metro Cebu.
Ang mga dinakpan kauban kini sa unang nadakpan sa PDEU-PIB-CPPO sa mi-aging adlaw diha sa Camella Homes Talisay, nga dul-an sa P3 milyunes sab ang nasakmit nga shabu. /