Langay nga hustisya

Human sa 26 ka mga tuig nga husay, nakombikto sa pito ka counts sa graft si kanhi first lady Imelda Marcos ug nimando ang Sandiganbayan sa pagdakop kaniya. Ang 89 anyos nga si Marcos moserbisyo og 6 ngadto sa 11 ka tuig sa matag count sa kaso nga nagagumikan sa iyang pagpatipas sa pundong 200 milyunes dolyares ngadto sa Swiss foundations sa 1970s dihang siya pa ang gobernador sa Metropolitan Manila.

Apan di pa ni matawag nga hingpit nga kadaugan batok sa mga Marcos tungod duna pa siyay higayon sa pag-apelar aron di siya mabilanggo. Posibleng sa iyang tibuok kinabuhi di siya makatilaw og bilanggoan tungod sa proseso sa hustisya sa nasod.

Hinuon, ang pagkombikto sa korte maisip nga kadaugan gihapon tungod kay nagkompirmar kini sa pagpangurakot sa banay nga Marcos. Nagsalikway kini sa ilang gipalutaw ug gilubag nga kamatuoran nga di tinuod ang mga pasangil nga sila nangurakot sa dihang namunoan pa si anhing presidente Ferdinand Marcos.

Estorya kini nga nakatuhop ngadto sa mga batan-on nga wa makakita ug makasinati sa kabangis sa rehimeng diktador nga nahimong notado sa mga kalapasan sa tawhanong katungod dihang gipatuman ang martial law.

Sa mga kaso nga ingon niani, gawas nga impluwensyado, duna sab silay kwarta, busa molanat pa ni og dugay ang pagpakanaug sa final nga hukom, nga magsustener sa desisyon sa Sandiganbayan o mopabor sa kampo ni Marcos.

Mao usab ni desbentaha sa balaud sa nasod kay kon duna kay kwarta, mahimong langayon ang proseso pinaagi sa pagpahimus sa mga abogado sa mga probisyon niini. Paglangay ang sagad taktika.Duna nay mga kaso, kansang mga akusado namatay na lang, wa pa mahuman ang husay. Mao ni ang mapait nga kamatuoran, mao nga dunay uban manglaktaw na lang.