Way hustisya sa Senate inquiry
ili sa ingon nga mibubu ko og bugnaw nga tubig sa kahigwa-os sa mga kabanay niadtong mga nabiktima sa extra-judicial killings sa ilang tinguha nga makakab-ot sila og hustisya sa nahitabo sa ilang kabanay niining gikatakda nga Senate inquiry. Si Senador Grace Poe misang-at og resolusyon nga nag-awhag sa Senate Committee on Public Order and Safety nga mopahigayon og imbestigasyon sa serye sa mga pagpamatay dinhi sa Sugbo sa mga personalidad sa illegal nga drugas.
Ang mga kabanay sa mga gipamatay sama nila ni Atty. Johna John Ungab, ang magamahang Dindin ug Mark Stephen Bas, ang mga kabanay niadtong Malubog 5, mipadayag sa ilang interes nga motambong aron makakab-ot sila og hustisya sa gidangatan sa ilang mga mahal sa kinabuhi. Gidudahan nga ang kapulisan maoy nagpaluyo ning serye sa mga pagpamatay. Apan hugtanong gipanghimakak ni Regional Police Office (PRO 7) director Debold Sinas.
Ato ning klarohon nga ang tumong sa inquiry mao ang pag-imbestigar sa isyo aron makapanday sila og mga balaod o pag-amendar sa usa ka balaod base sa ilang makuha sa imbestigasyon. Mao nay gitawag sa iningles nga ‘in aid
of legislation’. Usa kana sa mga gahum sa mga sakop sa Kongreso. Anaa kana sa Section 21, Article V1 sa atong 1987 Constitution. Pero ato ning klarohon nga walay mapriso aning congressional inquiries.
Ang labing mahimo sa komitiba mao ang pagpagawas og rekomendasyon nga mag-awhag sa mga investigative bodies sama sa Philippine National Police (PNP) o National Bureau of Investigation (NBI) sa pag-imbestigar niining maong mga kaso ug mataral sa hukmanan ang mga responsable. Ibalik lang gihapon kini sa kapulisan. Una nang giimbestigahan sa kapulisan ang ubang mga kaso. Apan gumikan sa kakulangon sa mga saksi ug ebedensiya wa molambo. O wa na ba kahay interes ang kapulisan nga mo-imbestigar kay ila ra kauban ang nagpaluyo.
Mismo si Sinas niangkon nga naay mga aktibong pulis nga nalambigit sa pagpamatay sa drug personalities. Apan toa kuno magtrabaho sa mga drug syndicate isip hitmen. Para nako ang Senate inquiry ‘in aid of reelection’ kay daghan sa mga senador magpapili sa sunod tuig nga eleksiyon.(bobbygnalzaro@ gmail.com)