Abusadong VIP nalimtan?

Naunsa na man diay ang nahitabo niadtong hit and run nga Very Importante Person (VIP) nga nakabiktima og nagmotorsiklo mga alas 12:37 udto sa miaging Oktubre 27, 2018 diha sa eskina A.S. Fortuna ug Hernan Cortes sa Syudad sa Mandaue?

Nakuha ang maong video sa Mandaue traffic command center ug nikatag kini sa social media. Gani, niabot na og 14,101 shares ug 667,000 views ang maong video diha sa Facebook page nga Philipines CCTV & Dash Cam Spotted.

Matod pa, nangayo og update si Mayor Luigi Quisumbing gikan sa kapulisan apan wa man kini nabalita. Nahibulong ko nga wa kini moguwa sa mga mantalaan.

Tingale, lahi lang gyud ang pag-evaluate sa mga editor karon sa maong hitabo. O basin, natabunan ang maong hitabo sa pagbisita ni Presidente Rodrigo Roa Duterte pipila ka adlaw human sa maong insidente.

Apan alang kanako, bisan pa og na-areglo na kuno ang biktima sa kantidad nga P20 mil, daghan man og mga kalapasan ang maong VIP gawas sa pagbangga sa motorsiklo.

Angay untang ma-follow up sa local media kay nag-involve kini og usa ka VIP sa Sugbo. Lalim bay duha ka mga SUV nga itom nga nag-convoy unya nag-wangwang pa gyud.

Una, ni-counterflow kini mao nga nakabangga. Ikaduha, nag-hit and run.

Basi sa interbyu sa ABS-CBN, dunay opisyal sa LTO nga nakabantay sa ikatulo nga kalapasan nga mao ang paggamit sa pekeng.

Karon, ang maong sakyanan niguwa sa usa ka hulagway nga nakuha sa miaging buwan sa Mayo. Ang hulagway nagpakitang kang Philip Salvador unya maklaro sa background ang maong SUV nga nagdala sa maong pekeng plaka.

Di kita makaingon nga iyaha kang Salvador o siya ba gyud ang naggamit sa maong SUV. Basin, nakatayming lang gyud nga diha siya sa tungod nag-posing.

Apan, gikuha ang maong hulagway ni Salvador pagka Mayo. Mao lang higapon ang pekeng plaka nga gigamit pagka Oktubre.

Mao diay tingale kadto nga nidagan ug hadlok magpadakop kay masakpan nga walay rehistro.

Apan nganong wala man marehistro ang maong SUV? Di ba kini smuggled?

Hinuon, di nato mabal-an ang kamatuoran sa maong sakyanan kon mo-relax na ang kapulisan.

Tingale angay lang sab nato i-follow up ang mando ni Mayor Quisumbing nga hatagan siya og taho sa kapulisan kabahin sa insidente.

Tinuod, kahibulongan gyud nganong nawala ang maong insidente gikan sa media. Di ko motuo nga ingon ana gyud ka gamhanan ang maong VIP nga makapahilom og mga sakop sa media? Tingale na-overtaken lang gyud og mga panghitabo samtang wa dayon makakuha og kopya sa blotter sa kapulisan ang ubang mga reporter.

Apan, sa pagkakaron, di angay na natong pangutan-on si Mayor Quisumbing kon unsa update gikan sa kapulisan?