Usa ka dako

Kaniadto sa dihang aduna pay balor ang atong kuwarta, may gitawag nga “usa ka dako”. Lingin nga puthaw kini nga sama tingali og gidak-on sa lingin nga mahulma kon idugtong ang tudlo ug kumagko. Daghang mahisgotan ang akong anhing nga amahan sa balor sa maong kuwarta sa pistaym pa. Kon wa ko masayop, ang usa kuno ka dako makapasulod na sa sinehan ug makapalit na og pipila ka mga ubas nga timutimoon. Ang bug-at nga sensillo, bugat sad og balor.

Mipaambit si Jesus og usa ka panghitabo didto sa templo sa Jerusalen diin “daghang mga dato ang naghulog og dagkong kantidad.” Dako ang balor sa kuwarta nga gihatag sa mga dato. Siguro dako nig ikatampo sa mga pagpadagan sa maong balaang lugar. Apan “miabot ang usa ka kabos nga balo ug mihulog og duha ka sensilyo, balig pipila ka sentabo.” Pila ra gyod kahay bili sa maong salapi kon itandi sa nahatag sa mga sapian.

Apan lain ang nakita ni Jesus: “Sa pagkatinuod ako nag-ingon kaninyo, kining kabos nga balo naghulog og labaw pa gayod kaysa tanang nanghulog ngadto sa panudlanan sa templo. Kay ang tanan nanghulog gikan sa sobra sa ilang katigayonan, apan, siya, gikan sa iyang kakabos naghulog sa tanang kaniya, ang tanan nga iyang kabuhian.” Minghatag ang balo hangtod nga mipaak kini sa iyang kinabuhi mismo. Gamay nga kuwarta apan dako diay Binasi sa 1 Hari 17:10-16; Salmo 146; Hebreo 9:24-28; Marcos 12:38-44 kaayog balor sa mata sa Dios.

Ang paghatag nga sinagulan og pagtuo ug sakripisyo makapahimuot kaayo sa Dios. Makita kini sa kinabuhi ni Elias sa iyang hangyo sa balo sa Sarefat. Nagpaluto siya og torta sa babaye gikan sa katapusang harina ug lana niini. Mipatuo ang babaye ug wala na siya ug ang iyang anak mahutdi og makaon. Milagrohan sa Dios ang mosakripisyo sa paghatag sa uban diha sa Ginoo.

Ang labing hingpit nga paghatag nga inubanan og hingpit nga sakripisyo mao ang gihimo ni Jesus sa pagsulod niya sa langit. Pinaagi niini “gitangtang niya ang sala sa kadaghanan...ug gidala ang kaluwasan ngadto kanila nga mahinangpong naghulat kaniya,” sumala pa sa sulat ngadto sa mga Hebreo. Wala nay makalupig pa sa gibuhat ni Jesus. Kinahanglan lamang idugtong nato ang atong mga sakripisyo sa hingpit nga sakripisyo ni Jesus aron ang atoa mahatagan og bili.

Matag usa kanato adunay usa ka dako. Mahimo kining butang, abilidad, kabatid, oras, salapi, ug uban pang nga ania kanato. Gamay tingali kini og bili atubangan sa mga tawo apan dako og bili kon dinugtong kang Jesus. Diha sa pagpaubos, pagtuo, ug gugma ang atong usa ka dako makabaton og balor nga moabot sa kalangitan. Dili nato tipigan ang atong usa ka dako. Ipaambit nato kini kay makapahimuot kini sa Dios ug makatampo sa kaluwasan sa uban.

Unsa may atong usa ka dako?