Pagkaon ug katulog
Nindot kaayo ang imong bation kon makatulog ka og sayo unya makamata og sayo. Mas nindot pa gyud kon makapasingot ka sa buntag sayo ug mamahimo na kini nimong habit kada adlaw. Kon ubanan nimo ni og maayo nga diet, dako kaayo ang kahigayunan nga di ka masakit o kon maigo man gani, panagsa ra ug dali rang maka recover.
Maluoy ko magbasa sa posts sa mga millennial nga naglisod sila sa pagkatulog o kaha disturbed ang ilang panghuna-huna. Sa mga pagtuon, nakita nga ang atoang gisulod sa atoang tiyan ug atoang gibuhat makaapekto sa estado sa atoang mentalidad. Busa, mas maayong huna-hunaon nato ang atoang kahimtang kon duna may problema sa pagkatulog ug kanunay hasol ang huna-huna. Kining tanan influenced sa atoang gikaon ug gibuhat.
Sa college pa ko, nituon ko og yoga sud sa unom ka buwan. Ni-practice sab ko og vegetarian diet sud sa du haka buwan. Kahibawo ka og unsay resulta? Gaan kaayo ang akong paminaw ug clear kaayo ang akong huna-huna. Kana bang kalmado ko pirme ug pinahimutang ang mga estorya. Clear kaayo ang idea. Labaw sa tanan, lami kaayo ang akong katug.
LIFESTYLE
Karon, ang atoang lifestyle influenced kaayo sa Western nga pagpuyo. Nanaghan ang fastfood nga kasagaran, way ayo ang mga pagkaon kay dunay preservatives. Pun-an pa sa mga pagkaon nga dunay caffeine ug sugar. Ang resulta, disaster sa lawas ug panghuna-huna.
Di man ko doctor, apan daghan ko og nabasa nga studies nga nag-support sa theory nga dunay epekto sa panglawas ug kahimtang sa panghuna-huna ang di maayong pagkaon. Ang example nga imo kining makita diha sa mga atleta nga dunay regimen sa training ug maayong pagkaon nga gitamod. Sagad ani nila maayo og panglawas ug panghuna-huna.
Busa, importante kaayo nato ang maayo nga lifestyle taliwa sa nagkapaspas nga kinabuhi. Ako bitaw, bisan tuod tagsa na lang ko maka exercise tungod sa ka busy, mangita kog time nga maka-relax ug makapasingot og makadiyot.
Di sab kaayo ko tigkaon sa fastfood stores ug di ko tig-inom kanunay og softfrinks. Maihap lang ang mga higayon.
USBA
Kon naglisod ka man og katulog, kanunay hasol ang hunahuna ug irritable, panahon na nga imong usbon ang lifestyle. Try og kaon og utanon, pangitag higayon nga makapasingot ka bisan 15 ka minutos sa usa ka adlaw ug likayan ang mga tam-is ug caffeinated nga mga ilimnon ug pagkaon.
Tultol sab og katulog. Tanawa nya, bisan sa first two weeks nga imo ning buhaton, makakita ka og kalainan sa imong pamati ug panglawas. Nganong segurado ko? Kay naagian ko na kana kaniadto. Suwayi.