Trust is not enough
Bisag di pa dugay ming nagkaila si Gerald apan dali ra ming nagkasuod. Nindot siyag awto ug kanunay kong mosakay ani labi nag gusto ming mag-joy riding parehas karon. First time pa kong nakasuroy sa Busay, bukirang bahin sa siyudad. Taas kini ug hapit makita ang tibuok siyudad.
Malipayon ko.
“Wa ko pahimusli ang higayon nga gikauban tika ron, Belen. Tinuod man gyud nga nag-love at first sight ko nimo.”
“Kusoga sab nimo, uy, Gerald. Well, hunahunaon ko pa na.”
Nakita ko nga dihay kalipay sa mga mata ni Gerald. Tingali, nagtuo siya nga usa na ka pasalig ang akong giingon niya, nga dako ang purohan nga sugton ko siya.
“Di gyud tika pasakitan, Belen, kon sugton ko nimo.”
Wa na lang ko magtingog. Nalingaw ko nga nagtan-aw sa palibot, sa mga lugar nga among naagian ni Gerald. Unya nahunahuna ko si Rod. Nakapanglingo na lang ko. Bisag naka-move on na ko sa among panagbuwag apan di ko kalimdan ang akong kaugalingon, ang akong pagbati, nga hangtod karon siya pa gihapon ang lalaki nga gipitik sa akong kasingkasing.
Gabii na kong mipauli sa boarding house. Seryuso si Lorena nga nagtan-aw nako samtang naglingkod siya sa ngilit sa iyang higdaanang double deck.
“Si Gerald na sab ang imong gikauban ron, no, Belen?”
Mitando ko. Malipayon kong nagsugid niya sa among pagpanuroy ni Gerald sa Busay.
“Hay nimo, Belen. Pagkadali ra gyud nimong mosalig og laki. Wa gyud ka motagam sa gibuhat ni Rod nimo.”
“Buotan man si Gerald sa akong paniid niya, Lor.” Miseryuso ko. Nahunahuna ko si Rod nga gipahimuslan ang dako kong pagsalig niya.
“Mao sab nay imong giingon nako dihang gisugot mo si Rod, di ba?”
Wa na ko makatubag. Nagilis ko para sa balay. Unya mihigda ko.
“Wa koy pagsalig anang Gerald, Belen. Sa iyang kaguwapo ug anak pa gyud og dato, segurado kong pasakitan ka lang niya.”
“Wa ko pa man siya sugta, Lor.”
“Basta hunahunaa lang gyud pag-ayo una ka makigrelasyon niya.” Gitando ko si Lorena. Usa ka hapon nga gikan ko sa eskuwelahan, nakita ko si Gerald nga dunay kaubang guwapang babaye. (TAPUSON SUNOD GULA)