Kampiyon sa karate

ERLANDO LIGAN MAJAN Mother Mary of Perpetual Help Street, Hipodromo, Cebu City

Gikaintapan si Johnny sa mga estudyante sa ilang unibersidad. Nailhan siya nga kampiyon sa karate sa ilang dapit. Mapasigarbuhon siya niini. Walay langas sa unibersidad nga mangahas kaniya. Kon may mangahas man , siya ra mismo.

Giduol niya ang batan-ong lalaki nga may gisul-ob nga anteyohos. Bag-o pa kini sa ilang unibersidad. Apan ang estudyanteng babaye nga iyang gikaibgan, si Mary Bliss, moduol kanunay sa batan-on nga upat ang panan-aw ilabi nang baga ang bildo niini.

Kalit niya nga gisagpa ang nawong niini ug iyang gipahimangnoan dayon. “Pagbantay, ha?

Mabun-og ka unya kon moduol pa kang Mary Bliss. Likayi siya. Ako ra siya. Nakasabot ka?”

Igo ra sa pagyangoyango ang batan-ong lalaki. Molikay na kini kang Mary Bliss, apan modutdot hinuon kini niya. Mao nga makontrahan ug ma-

bun-og siya kang Johnny.

“Gahi ka gyod og ulo! Di ka makasabot,”

Nakabungat ang batan-ong lalaki. “Moundang na lang ako sa pagtungha. Si Mary Bliss man god ang moduol kanako. I’m sorry, ha?”

Sukad niadtong adlawa, wala na mopakita ang batan-ong lalaki, apan si Mary Bliss magpangita man kaniya. Ug nakatultol na kini kon hain magpuyo ang batan-ong lalaki ug magduawan na kini kanunay.

Gisundan ni Johnny si Mary Bliss kon hain kini mopaingon. Sa usa ka dalan, sa eskinang bahin, may mga estambay nga nag-inom ug nangahubog na. Gikab-ot si Mary Bliss ug gibugalbugalan siya. Nainit si Johnny ug nakigharong siya sa unom ka estambay nga may mga puthaw sa tubo ug may gidalang mga kutsilyo.

Nagtuo siya nga malukapa ra niya ang mga estambay. Gidumog siya ug nahalukapa. Misiyagit si Mary Bliss ug nangayog pakitabang. Nadunggaban na si Johnny. Ug may miluwas kaniya. Nangatuali ang mga estambay ug may nangapiang.

MIabot ang mga barangay tanod ug gipangdakop ang mga estambay.

Gidala si Johnnny sa usa ka ospital ug gipatambalan.

Nakaila niya ang miluwas kaniya. Gidala kini sa iyang head coach sa karate, si Sir Freddie.

“Siya ang anak sa akong igsoon nga usa ka world karate champion. Anhi na sila mopuyo ning atong dapit. Tabangan nila ako sa pagpadaku sa akong karate gym.”

Nahingangha si Johnny ug igo ra siya sa pagpasalamat. Gibati siyag tumang kaulaw.

Mipaila ang batan-ong lalaki kang Johhny nga miluwas kaniya. “May hinigugma na ako, Ania siya karon. Nagpaingon na dinhi. Ayaw kabalaka kang Mary Bliss. Dili ko siya ilogon diha kanimo.”

May batan-on ug maanyag nga babaye nga misangpit sa iyang manluluwas. “Ben, padayon sa imong pagtungha... Kay kon dili, magselos ko nianang giingon nga Mary Bliss… “ (KATAPUSAN)