ANGHEL SA INAHAN
Nibanos ang tumang kalipay nga gibati ni Cherry Rose Alegarbes dihang luwas nga nahimugso ang kamaguwangan nga anak nga si Angel Rose Alegado.
Ang 38 anyos nga ginang nabutang sa peligro ang kahimtang human ni-us-os ang ihap sa iyang white blood cells (WBC) nga mas taas kon itandi sa iyang red blood cells (RBC) samtang siya nagsabak ni Angel.
Siya na-admit sa usa ka pribadong tambalanan sa dakbayan sa Sugbo sud sa upat ka adlaw dihang nagpito pa lang ka buwan sa iyang sabakan si Angel.
Gikan sa maong buwan hangtod nga siya nanganak, nagsige na siya og suka.
“Mao tong before ko manganak, nihapit ko sa altar sa hospital kay pirmero man ni ug nilitok og pag-ampo kang Mama Mary kay siya man atong inahan. “Mama Mary, tabangi intawon ko nga luwas ni mogawas akong anghel,” pagbalik-lantaw ni Cherry sa nahitabo sa wala pa siya manganak kang Angel.
Nadungog ang iyang pag-ampo kay normal nga nahimugso ang babayeng anak alas 8 sa buntag niadtong Oktubre 23, 2000 sa St. Anthony Mother and Child Hospital, siyudad sa Sugbo.
Si Angel nitimbang og unom ka libras.
“Nakaloy-an ko ni Mama Mary kay normal akong pagpanganak. Nalipay ko ug nakahilak paggawas niya. Bahala na’g naay problema pagbuntis nako basta luwas siya nigawas,” saysay sa ginang sa Superbalita Cebu.
Apan wa matapos ang pag-antos ni Cherry kay human niya gihimugso si Angel siya nakuyapan ug nag-bleeding hinungdan nga siya giabunohan og usa ka bag nga dugo human nikunhod na usab ang ihap sa iyang WBC.
Siya mapasalamaton kay nagdako si Angel nga usa ka madasigon, paraygon, matinahuron, mahigugmaon ug mapinanggaon nga anak.
Niadtong Oktubre 23, gisaulog ang ika-18 nga kasumaran sa adlawng natawhan ni Angel sa Abuhan Restaurant sa N. Bacalso Avenue, ning dakbayan.
Gawas sa dalaga, gipakatawo ni Cherry ang ikaduhang anak nga si John Nathaniel Alegado, 16, niadtong Disyembre 7, 2001.