Pahalipayan ang kapulisan sa Sugbo
Makapadasig kining lakang karon ni Konsehal Dave Tumulak nga moduso og resolusyon nga naghangop sa kalampusan sa kapulisan batok sa gidiling drugas dinhi sa Syudad sa Sugbo.
Nasikop sa kapulisan ang usa ka dakong pusher diha sa Barangay Tisa diin nasakmit gikan kaniya ang shabu nga mobalor og P39 milyones.
Matod pa, kining maong pusher nasikop human sa dugay-dugay nga surveillance operation sa kapulisan. Bag-o kini nga nawong lahi sa mga nailhang mga personalidad nga nasikop na.
Mga kapin na sa tuig nga milabay, duna man gud kadtoy mga pusher nga diha dagan sa Barangay Tisa human giinitan sa mga awtoridad ang drug network diha sa Barangay Duljo-Fatima.
Alang kanako, angay lang pahalipayan ang kapulisan tungod niining ilang kalampusan batok sa gidiling drugas.
Matod pa ni Tumulak nga mao ang deputy mayor for police matters ug chairman sa Committee on Public Order and Safety, “hunahuna ang P39 milyones nga shabu. Kon naa pa kini sa mga barangay, pila na kaha ang nangabuang.”
Mahinungdanon nga mabantayan nga si Konsehal Tumulak sakop sa mayorya sa Konseho. Buot ipasabot, siguradong mauyonan kini sa tibuok Konseho.
Sigurado ko nga mauyonan kini sa mayoriya. Di sab makababag niini ang minoriya kay baruganan man niini mao ang pagsuporta sa kapulisan. Siguradong suportahan sab kini ni Mayor Tomas Osmena.
Nagsibya kining maong lakang ni Konsehal Tumulak sa mensahe nga dili diay kaatbang ang pagtan-aw sa administrasyon ni Mayor Osmena sa kapulisan. Modayeg kini sa maayong performance.
DISIPLINA
Makadayeg sab kita niining ka-istrikto ni Senior Supt. Royina Garma, ang director sa Cebu City Police Office (CCPO), nga niresulta sa pagdisiplina sa labing menos 20 ka pulis nga nasakpang natulog samtang nag-duty, nagsul-ob sa giingong improper uniform, ug nagduwag online games.
Nasakpan kini sila atol sa mga inspeksyon nga gipahigayon ni Garma.
Lakip sa imbestigahon karon mao ang mga station commander sa Pari-an, Abellana, Carbon, Guadalupe, ug Mabolo tungod sa command responsibility.
Sakto ang punto ni Garma. Gikinahanglan ipatigbabaw ang disiplina.
SINULOG
Ato sab nga nasayran gikan ni Konsehal Tumulak nga maayong pagkaplantsa na ang koordinasyon sa City Hall ug sa kapulisan diha sa preparasyon alang sa umaabot nga Sinulog.
Buot ipasabot, bisan pa man sa gipalutaw nga panagbangi tali sa kapulisan ug sa City Hall, maka-coordinate gihapon sila alang sa kaayuhan sa Syudad sa Sugbo ug alang kang Senyor Santo Niño.