1 patay, 1 nasikop, menor na-rescue

Usa ang patay human giingon nga nisukol sa buybust operation sa kapulisan sa Barangay Mabolo, dakbayan sa Sugbo niadtong Sabado sa gabii, Disyembre 1.

Samtang, usa ang nasikop ug usa ka menor ang na-rescue atol sa susamang operasyon.

Ang napatay naila nga si Raphael Arcipe alyas Pael, 18. Ang nasikop naila nga si Jerie Cataraja Ytang, 24, ug laing usa ka 13–anyos ang na-rescue.

Atol sa gihimong operasyon sa City Drug Enforcement Unit sa Cebu City Police Office (CCPO) sa Sitio Abbatoir, Mabolo giingong nakigpinusilay si Arcipe nga nagdala og armas.

Napabuthan kini og una sa kapulisan hinungdan sa kamatayon niini.

LAPU-LAPU CITY

Usa ka senior citizen uban ang upat ka mga tawo ang nasikop sulod sa usa ka beauty parlor sa Barangay Poblacion, dakbayan sa Lapu-lapu, kagahapon sayo sa buntag, Disyembre 2,, human makuha-i og kapin sa tunga sa milyon nga balor sa drugas.

Ang mga nasikop mao sila Patricia Lim, 64, nag-abang sa Pusok Proper, Lapu-lapu, ug nasikop usab ang subject sa buy bust operation nga mao si Marilou Apa, 45s, taga Barangay Poblacion, Lapu-Lapu.

Nasikop usab ang tulo ka bayot nga sila si Hildo Gabat, 28; Ramil Jakosalem, 32, pareho nga taga Poblacion, Lapu-lapu City; ug Eugene Potayre, 29, lumad nga taga lungsod sa Madridejos sa probinsya sa Sugbo.

Matud ni Police Chief Inspector Jaime Tolentino, deputy head sa City Intelligence Branch sa Lapu-Lapu City Police Office (LLCPO), nga si Apa ang anaa sa ilang drug watch list isip High Value Target (HVT),human nga nakadawat og taho ang kapulisan nga kini ang nipuli sa iyang kapuyo nga si Ariel Oronan, kinsa napatay sa police operation niadtong Abril ning tuiga, sa Poblacion.

Suwerte usab, matud ni Tolentino nga atol sa maong operasyon kagahapon sa kaadlawon, anaa usab ang tig-suplay sa drugas ni Apa nga mao si Patricia Lim, kinsa mao ang inahan sa bigtime drug personality nga si Jessie Casado o mas naila nga ‘Kano' kinsa napriso na niadtong Septiyembre ning tuiga human gipatay niini ang usa ka Korean national sud sa usa ka motel.

Sa gihimo nga imbestigasyon sa kapulisan nga sila Lim ug iyang mga anak, ang nalambigit sa druga, ug nga gawas kang ‘Kano', laing usa sa 10 niya ka anak ang napriso na usab tungod sa illegal nga drugas.

Nakig-alayon na ang LLCPO sa uban nga mga intelligent unit sa Cebu City Police Office, CPPO ug sa MCPO alang na sa dugang' kasayuran kalabot sa kon unsa na kadaku ang drug distribution sa pamilya ni Lim.

Ila usab gipalawman pa ang imbestigasyon sa posible nga kalambigitan sa tag-iya ug mga trabahante sa beauty parlor diin nasikop ang lima.

Ang laing tulo ka tawo nga nasikop nga sila si Gabat, Jakosalem ug Potayre, mga beautician, ang giingon nga nituyo sa maong parlor aron sa pagpalit, nakuhaan sila og tagsa ka pakete sa gituohan nga shabu.

Samtang nakuha gikan kang Apa ang usa ka dakung bulto sa gidiling drugas, ang laing 9 ka dagko nga bulto ug 8 ka gagmay'ng pakete sa shabu ang nasakmit gikan kang Lim.

Gibanabana nga mobalor ang tanan nga nasakmit ngadto sa P600 mi.

Dugang ni Tolentino nga usa sa ilang namatikdan nga mga modus diha sa pagpamaligya, nga kundi menor de edad, senior citizen na ang mohatod sa shabu sa ilang kustomer.