Unfair sa transport sector
Dugay nang dili patas ang kahimtang sa industriya sa transportasyon nga dili patas o dili makiangayon. Daghan stakeholders ubos sa industriya gikan sa mga drayber, konduktor, inspektor, operator ug uban pa, lakip sa mga kompaniya sa lana. Ning tanang magduduwa, ang naulahi maoy labing bintaha labi na sa kasamtangang polisya sa kagamhanan nga deregulasyon sa presyo sa lana, ang butang diin tanan nakadepende sa pagpadagan sa makina.
Dunay grupo nga nagsinggit sa pagpabalik sa regulasyon nga polisya sa lana. Apan ngano kaha nga nagpakabuta-bungol ang mga nangagi ug kasamtangang kagamhanan? Bug-at lang yud ang pressure sa mga multi-national nga kompaniya sa lana?
Mao kini hinungdan nga kon dunay pag-umento sa kalibotanong merkado sa lana, ang mga kompaniya sa lana sayon lang mopasa sa maong usbaw ngadto sa ilang pump price nga walay pagbabag sa kagamhanan tungod sa deregulasyon. Ang direktang mobaga sa tanan mao ang mga konsumidor, diin nag-una ang mga drayber, kinsa dili dayon makahimo og adjustments sa pletihan tungod sa grabe ang regulasyon sa mga kabus nga bahin sa sektor sa transportasyon.
Karong adlawa, Disyembre 3, ang technical working group (TWG) sa Land Transportation Franchising and Regulatory Board (LTFRB) gikataho nga mag-umol og formula alang sa pag-pre-determined sa pletihan sa publikong sakyanan sa higayon dunay paglihok sa presyo sa krudo.
Si LTFRB Chairman Martin Delgra III niingon nga ang TWG nga pangulohan ni LTFRB Executive Director Samuel Aloysius Jardin, langkuban sa Department of Ener y (DOE), Department of Trade and Industry (DTI), Department of Labor and Employment (Dole), ug National Economic and Development Authority (Neda).
Hinaut nga magbunga kini og kaayohan. Mapapas ang dugay nang dili makiangayon nga kahimtang sa transportasyon.