P3T NA TANAN?

RATSADA NGA MULTA ALANG SA MGA TRAFFIC VIOLATION SULOD SA Cebu City

Para sa pagsilsil og disiplina sa mga drayber, ang dakbayan sa Sugbo pinaagi sa Cebu City Transportation Office (CCTO) mopahamtang og bug-at nga multa para sa mga traffic violator. Si Francisco Ouano, CCTO

operations head, nitug-an ning pamantalaan nga adunay direktiba si Mayor Tomas Osmeña nga ikatuluon ang bayranan sa traffic fines.

Gipasabot ni Ouano mao nga himuon nga tag P3,000 ang traffic violations nga kanhi adunay multa nga P1,000.

Kini sama sa disregarding traffic signs (DTS) no entry, no u-turn, go signal, stop signal, no left turn, no right turn, PUJ stop, no parking anytime, no stopping, right turn only, left turn only.

Lakip ang reckless driving, diagonal parking, parallel parking , parking opposite direction, parking on sidewalk, parking on intersection, parking on corner, parking on driveway, parking on puj ug bus stop, double parking.

Ang driving on sidewalk, overnight parking, backride below 7 years old, not following route, truck ban, junction box, loading and unloading, obstruction ug uban pa. Si Ouano niingon nga nahunahunaan sa mayor ang maong pamaagi gumikan sa nagkagrabe nga kahuot sa trapiko sa siyudad.

“No, I want to implement that right away, once dako ang penalty maminaw ug motuman gyud ang mga tawo,” pagkutlo ni Ouano sa pamahayag ni Osmeña.

Si Konsehal Dave Tumulak niingon kinsa niadto lang Marso 10 ning tuiga naaprobahan ang iyang ordinansa nga nagsaka ngadto sa P1,000 gikan sa tag P500 nga traffic violation ug andam niyang amendahon ang iyang nahiunang ordinansa.

“Atong i-amend kon maoy kagustohan sa atong mayor,” padayag ni Tumulak.

UYON UG SUPAK

Gihangop sa Cebu Integrated Transport Service Cooperative (Citrasco) ang tinguha ni Osmeña kon mao kini ang paagi aron mahapsay ang dagan sa mga sakyanan.

Si Jericho Mari Jumapao, chairman sa Citrasco, niingon nga maayo ang katuyoan sa mayor tungod sa nag-anam na og kabaga ang trapiko.

Ang CCTO pinaagi ni Ouano nitumbok nga usa sa mga hinungdan sa traffic congestion mao ang walay igo nga disiplina sa mga drayber nga dili motuman sa traffic rules ug dili panumbalingon sa mga drayber ang citation ticket sanglit gaan ra ang multa. Si Richard Cabucos, presidente sa Metro Cebu Taxi Operators Association(MCTOA), nihulagway nga bug-at ra kaayo ang P3,000 nga multa.

Matod niya nga husto ra ang P1,000 nga multa para magmatngon ang mga driver apan iyang giangkon nga adunay mga nagmaneho nga managinot sanglit adunay mga pasahero nga adto mag-atang sa no stopping area.

Gisaway ni Cabucos ang plano ni Osmeña ug iya usab gipikhan ang mayor sa pagpalapad sa operasyon sa Angkas

(motorcycle for hire) diin ang ilang mga taxi operator ang grabeng naapektohan ug nakatampo sa kahuot sa trapiko.

Gipadayag ni Cabucos nga si Osmeña ang nagpasiugda sa Angkas diin matag barangay adunay kota nga tag 120 ka motorsiklo kon 9,600 ka drayber sa 80 ka barangay nga mamasahero.

Iyang gihulagway nga ang kaugalingong interes ni Osmeña ang giatiman hilabi na nga nag-angat ang piniliay.

INCOME MO-DOBLE

Gipadayag ni Ouano nga kon mapatuman ang P3,000 nga multa sa matag violation, gawas nga mahapsay ang trapiko, mosaka usab ang kita sa CCTO.

Matod ni Ouano, ang CCTO adunay kapin o kulang P8 milyones nga income matag buwan gikan sa administrative penalties ug kini mahimong P16 milyones o sobra pa kon matuman ang kausaban. /