Patay buhion, buhi napatay
Naunsa man kini si kanhi PNP Chief General Bato dela Rosa, iyang buhion ang gipatay na nga death penalty sa Pilipinas kon mahimo siyang senador.
Naay buhi nga nalambigit sa kalihukan sa ilegal nga drugas gipamatay ug gipasangil ngadto sa kapulisan.
Ang pamahayag gihimo ni dela Rosa sa pagtambong sa Anti Drug and Peace and Order Summit 2018, sa lungsod sa Tuburan, Cebu.
Samtang, morag hilas man tan-awon ang gihimong pagabi-abi ni Daphne Lagon, kandidato sa pagka-mayor sa Tuburan kang dela Rosa.
Kay wa may kooperasyon ang ilang lokal nga partido sa kampanya batok sa problema sa illegal nga drugas.
Kini maoy hinuktukan sa kanhi heneral ug si kinsa ang mikuyog kanila sa adbokasiya batok sa drugas. Mao nay giingon nga nagkuyog apan wala mag-kauban.
FINAL NA!
Among giyak-an kauban ang mga sakop sa media ang buhatan sa Comelec Cebu province sa katapusang adlaw sa withdrawal ug substitution sa mga kandidato niadtong Nobiyembre 29.
Tungod sa mga hugonhugon nga dunay mopuli ug moatras sa gidaganan sa dagkong katungdanan ilabi na sa posisyon sa pagka-gobernador ug bise gobernador.
Wa diay mosibog ug mipadayon gyud si Kongresswoman Gwen Garcia alang sa pagka-gobernador ug Daphne Salimbangon alang sa pagka-bise gobernador.
Migawas man gud ang mga tabitabi nga mopuli si Atty. PJ Garcia ug si Gwen magpabilin sa pagka-kongresista.
Samtang si Dapne hulipan sa iyang amahan nga si 4th District Kongressman Benhur Salimbangon.
Si Atty. Winston Garcia mopuli sa iyang igsuon nga si Nelson Garcia alang sa pagka-kongresista sa ika-pitong distrito.
Kay natubag naman ang mga pangutana kay wa may mga kausaban sa nahisgutang posisyon, ug karon ang gihisgutan mao nasab ug si kinsa ang nakabintaha.
Matod pa sa mga yanong tigpaniid sa pulitika nindot nga kumbati sa pagka gobernador kay bugno alang sa mga babaye.
Samtang mas sayon ang kadaugan sa buotan, maayong tawo ug ligdong nga si Gobernador Davide kontra ni Salimbangon sa pagka-bise gobernador.
Matod pa nila lupigon man tuod si Magpale sa kuwarta ni Garcia, apan gamay lang bikil ni Gwen tungod sa mga isyu sa disqualification ug korapsyon delikado kining matikangkang.
Si Gwen gipatangtang sa serbisyo ug gidid-an nga dili na makahupot sa bisan unsang katungdanan sa Ombudsman tungod sa kasong grave misconduct.
Apan miapelar ang kongresista ug gikuwestyon ug gisaway ang desisyon sa Ombudsman.