LAING SUNOG MIIGO SA KAMPUTHAW
IKADUHA SA BARANGAY SA TUIG 2018
Dili mominos P1 milyon ang danyos sa 70 ka mga balay nga naugdaw sa sunog sa Upper Purok 3, Barangay Kamputhaw, siyudad sa Sugbo kagahapon sa buntag, Disyembre 5.
Kini ang ikaduhang sunog sa dapit ning tuiga. Ang unang hitabo niadtong Agusto.
Sumala sa Department of Social Welfare Services (DSWS) sa siyudad sa Sugbo, 252 ka indibidwal ang apektado apan nagpadayon pa ang ilang pagpanglista atol ning pagsuwat.
Matod ni Fire Chief Inspector Noel Ababon, Cebu City Fire Marshal, nadawat nila ang alarma sa sunog alas 10:20 sa buntag ug giisa sa
2nd alarm pagka alas 10:25 sa buntag ug 3rd alarm pagka alas 10:27 sa buntag.
Tungod sa kadako sa lugar ug sa kadaghan sa panimalay, ang alarma ilang gisaka sa sa
task force alpha sa alas 10:45 sa buntag ug hingpit kining na kontrolar paglabay sa 30 minutos.
Wala pa usab matino kung diin nagsugod ang kayo sanglit daghang gipanganlan ang mga residente ug tungod niini, ipatawag kini sa Fire Department aron makuhaan sa ilang pamahayag.
Apan usa sa mga residente ang nitug-an sa Superbalita Cebu nga nagsugod ang kayo sa usa ka balay sa tungatunga sa sityo nga daling mikatap.
Adunay pangalan nga nakuha ang mga bombero apan dili lang una sila mohukom nga didto nagsugod ang kayo gawas kung ila na kining nahinabi o matapos ang pakisusi.
Si Konsehal Helen Bejic, nagpuyo sa Purok 3 Upper Kamputhaw, nagkanayon nga nagsugod ang kayo sa panimay sa pamilyang Salapi.
Ang kaapiki sa dapit ang gibasol sa konsehal nga nag lisud ang fire volunteers nga nakaabot sa dapit diin nahitabo ang sunog.
Giangkon ni kapitan Jessica Cadungog sa barangay Kamputhaw nga naapil sa pagka sunog ang mosque sa Muslim
community sa iyang barangay ug ang mga balay niini.
Mahimong makabalik ra hinuon sa pagtukod sa ilang balay ang mga apektadong residente sanglit ilaha naman ang maong yuta nga gitarukan sa ilang mga panimay.
Iyang rekomendasyon nga ipa-re-blocking ang mga panimay nga tukoron pagbalik sa
interior niini nga bahin aron kung masubli ang sunog dali ra nga maka montar ang mga bombero sa ilang mga kagamitan.
Tungod kay nahurot na ang
calamity fund sa barangay mag patabang ang kapitan sa kagamhanan sa syudad sa Sugbo ilabi na sa pagkaon sa mga nasunogan.
Awhag usab niya sa publiko nga mohatag ug hinabang sa mga nasunogan ilabi na nga nagsingabot na ang pasko. “Hurot jud ang among calamity fund ron kay nasunogan man sad mi sa Purok 3 lower so zero gyud ang among
calamity fund so manawagan sad mi kung kinsa toy ganahan nga mo donate og goods or used clothing we will appreciate it kay kinahanglanon kaayo nato diri,” matod ni Kap. Jessica Cadungog.
Kasamtangan nga gipahimutang sa barangay gym ang mga apektadong pamilya samtang nagpaabot pa nga maka balik sa pagpatukod sa ilang panimay.
DILI MAKABALIK?
Dili pa makabalik sa ilang
mga nasunogan sa Kamputhaw.
Si Genevieve Alcoseba, pangulo sa Division for the Welfare of the Urban Poor (DWUP), nagkanayon nga subay sa ocular inspection sa ilang buhatan, ang lugar nga nasunogan gipanag-iya sa University of the Phillipines (UP) ug wala kini mahisakop sa 93-1 nga Provincial Ordinance. “Hopefully we could have the
support of UP aron mapabalik nato ang atong kaigsuonan nga nasunogan” Padayag ni Alcoseba.
Iyang gipahibawo nga mismo si Mayor Tomas Osmeña naninguha aron dili mapapahawa ang mga residente gumikan lang sa sunog.
Ang Department of Social Welfare and Services (DSWS) dali usab nipadala sa ilang mga tawo aron asikasuhon ang mga nasunogan diin sila nihatag og packed meals nga molungtad hangtod sa tulo ka adlaw.
Ang ilang financial assistance nga tag P20,000 para sa mga tag-iya og balay gikatakdang madawat paglabay sa usa ka buwan gikan sa kagamhanan sa dakbayan. /